داوا لە هاوڵاتیان دەكرێت گۆشتی سەرشەقامەكان نەكڕن

06/04/2016 - 10:30 بڵاوکراوەتەوە لە هەواڵەكان

بەڕێوەبەرایەتی‌ ڤێترنەری‌ سلێمانی ڕایدەگەیەنێت: ئاگاداری سەرجەم هاوڵاتیان دەكەین بەهیچ جۆرێك ئەو گۆشتانە نەكڕن كە مۆر نەكرابێت.


بەڕێوەبەرایەتی‌ ڤێترنەری‌ سلێمانی لە ڕاگەیەندراوێكدا كە وێنەیەكی دەست كوردیو كەوتوە  ڕایگەیاند: سەربڕینی ئاژەڵ لە قەراغی شەقامەكان بوە بە دیاریدە و پێویستە هاوڵاتیان دور بكەونەوە لە كرێنی گۆشت لەو فرۆشیارانە چونكە دەبێتە هۆی نەخۆشی لەوانە (ئەنسراكس، تای خوێن بەربوون‌ و كیسی ئاو) هەروەها دەبێتە هۆی پیس بوونی ژینگە.


لە ڕاگەیەندراوەكەدا ئەوەش هاتووە: پێویستە هاوڵاتیان گۆشتی ئەو شوێنانە نەكڕن كە مۆری كوشتارگەی پێوە نیە بە تایبەت ئەو فرۆشیارانەی لە سەر ڕێگای (قەرەداغ، ئەزمەڕ‌، مێرگەپان) گۆشت دەفرۆشن.

جێگەی ئاماژە بۆ كردنە ساڵانە ژمارەیەك لە هاوڵاتیان لە شەقامو شوێنە گشتیەكان ئاژەڵ بە شێوەیەكی ناتەندروست سەردەبڕن و تاوەكو ئێستاش لایەنە پەیوەندیدارەكان نەیان توانیوە   ئەو دیاریدەیە بنەبڕ بكەن.

 

سەلام بێستانسوری