ركابەری نێوان نیسان و تویۆتا تووندتر دەبێت

21/07/2017 - 20:28 بڵاوکراوەتەوە لە هەواڵ/ئۆتۆمبێل

 

 

 

تاكو دێت كێبڕكێی نێوان هەردوو كۆمپانیای ژاپۆنی، تۆیۆتاو نیسان توندو توندتر دەبێت، بە تایبەتی لە سەر ئاستی هەردوو ئۆتۆمبێلی بەهێزی نیسان پاترۆل و تۆیۆتا لاندكرۆزەر، بۆیە كۆمپانیای نیسان مۆدێلێكی تری نیسان پاترۆل دەخاتە بازاڕەوە كە خاوەنی مەكینەیەكی شەش پستۆنە.

سایتی كۆمپانیای نیسان ئاشكرای كرد، كۆمپانیاكەیان بۆ ساڵی ئایندە مۆدێلێكی (V6) ی ئۆتۆمبێلی بەناوبانگی پاترۆڵ دەخاتە بازاڕەكانی ڕۆژهەڵاتی ناوەراستەوە.

مۆدێلە نوێیەكەی پاترۆڵ لەسەر هەمان شانسی و شێوازی مۆدیلە (V8) ەكەی دەبێت و جیاوازییەكە تەنها لە مەكینەو گێڕی ئۆتۆمبێلەكەدا دەبێت، ئاستەكانیش هەمان ئاستی مۆدێلە (V8) ەكان دەبێت وەك (XE SE Platinum)، بەڵام هەندێك پارچەی بە مادەی سوكتر دروستكراوە، بەوەش كێشی نزیكی (100) كیلۆگرام كەمترە لە مۆدێلەكانی ساڵانی پێشووی.

مەكینە نوێیەكە هەمان ئەو مەكینە (V6) ەیە كە لەسەر ئێكس تیرا نوێ دانراوە، تەنها دەستكارییەكی كەمی دیزاین و پرۆگرامی كۆمپیوتەرییەكەی كراوە تا لەگەڵ قەبارەو كێشی پاترۆڵدا بگونجێت.

مەكینەكە توانای (275) ئەسپی هەیە كە نزیكی هەمان توانای مۆدێلی (V6) ی تۆیۆتا لاندكرۆزەرە، بەڵام بە نزیكی (%12) تاودانی لە تۆیۆتا لاندكرۆزەر زیاترەو كەمتریش بەنزین سەرف دەكات كە بە شێوەی تێكڕا دەگاتە (11.7) لیتر بۆ هەر (100) كیلۆمەترێك، ئەمەش بەراورد بە مۆدێلە (V8) ەكەی پاترۆڵ زۆر كەمترە.

كۆمپانیای نیسان لە بارەی مۆدێلە نوێیەكەی پاترۆڵەوە رایگەیاندووە: بەراورد بە هاوتاكانی، بێدەنگترو لەرزینی كەمترو بە رێژەی (%25) یش توانای راكێشان و بە بەرزیدا هەڵگەڕانی باشترە.

 

ئـ . كـ