مێژووی مەنجەنیقی سەربازی

11/05/2016 - 07:16 بڵاوکراوەتەوە لە هەواڵ/هەمەڕەنگ

 

 

مەنجەنیق ، بریتیە لەو جۆرە چەكەی كە لە سەردەمی كۆندا لەجەنگەكان بەكاردەهێندرا، بەتایبەتی بۆ داگیركردنی قەڵا بەرزەكان و قولەكان و شارەكان و تێیدا بەردی گەورەی پێدەهاوێژرا.
بەپێی سەرچاوە زانستیەكان ووشەی مەنجەنیق لەبنەڕەتەوە فارسیەو بەمانای (من باشتر نیم) دێت و لەكۆنیشەوە لەلایەن مەمالیك و خاچ دروشمەكان و مەغۆلەكان بەكاردەهێندرا.
بەپێی قەبارەكەی، مەنجەنیقی گەورەو بچووك هەیەو بەپێی قەبارەی جەنگەكە جۆری مەنجەنیقەكەش بەكاردەهێندرا.
باسی ئەوەشكراوە، كەكاتی خۆی نەمرودییەكان پێغەمبەر (ئیبراهیم) (سەلامی خوای گەورەی لەسەر بێت) بەهۆی مەنجەنیقەوە هەڵداوەتە ناو ئەو ئاگرەی كەبۆ سووتاندنی ئەویان ئامادەكردووە.
مێژوونووسی گەورەی یۆنانی (دیۆدۆرس) دەڵێت، مەنجەنیق داهێندراوی خۆیانەو لەساڵی (399) ی پێشی میلاد دروستیان كردووەو لەساڵی (397) بەكارهاتووە لەجەنگی نێوان (بونیقیەكان و یۆنانیەكان).
سەرچاوە مێژووییەكان دەڵێن، كاتی خۆی (سوڵتان ئەشرەف خەلیل) مەنجەنیقی گەورەو بەهێزی بەكارهێناوە بۆ شكاندنی گەمارۆی سەر شاری (عەكا) لەساڵی (1291) ی میلادی و ناوی مەنجەنیقەكەش (مەنسوری) بووە.
لەمێژوودا باسی ئەوەكراوە كەلەساڵی (350) ی پێشی میلاد ئیغریقیەكان مەنجەنیقیان بەكارهێناوەو ئەندازیارەكانی جەنگ دوو جۆریان دروست كردووە، یەكێكیان بەهێزو ئەوی تریشیان لاواز.
هەروەها لەسەدەی دووەمی پێشی میلاد رۆمانەكان مەنجەنیقیان بۆ جەنگ بەهۆی ڕەوڕەوە گواستۆتەوە، یان بەهۆی ئاژەڵەوە گواستراوەتەوە.
لەسەرچاوەكاندا باسی ئەوەكراوە یەكەم كەس كەبەرلەهاتنی ئایینی ئیسلام مەنجەنیقی بەكارهێنابێت كەسێك بووە بەناوی (جەزیمەی ئەبرەشی كوڕی مالیكی كوڕی فەهمی دۆسی).

هەروەها لەكاتی گەمارۆدانی تائیفیش لەسەردەمی ئیسلام كەسێك بەناوی (توفەیلی كوڕی عەمری دۆسی) مەنجەنیقی بەكارهێناوە.

 

ئـ . كـ