كەیهان كەلهور خەڵاتێكی جیهانی وەردەگرێت

09/08/2019 - 11:59 بڵاوکراوەتەوە لە هەواڵ/هەمەڕەنگ

 

 

كەیهان كەلهور ژەنیارو ئاهەنگدانەری ناسراوەی كورد، خەڵاتی ئێكسپۆی جیهانی باشترین هونەرمەندی جیهانی وومێكسی بۆ ساڵی (2019) مسۆگەر كرد.

بەڕێوەبەرانی كۆڕبەندی مۆسیقای گەلانی جیهانی وومێكس، لە ماڵپەڕی ئەو خەڵاتە وێرای دەربڕینی خۆشحاڵیان بۆ بەخشینەوەی خەڵاتی باشترین هونەرمەندی ساڵی (2019) بە كەیهان كەلهور، جەختیان لەوەكردووە: ئەم خەڵاتە بۆ شارەزایی و لێهاتوویی تایبەتی ئەو ویرتێئۆزەی كەمانچە لە نوێگەری و داهێنانی زمانی نوێی ڕاچڵەكێنەرانەی مۆسیقایی و گەیاندنی نەریتی مۆسیقای كلاسیكی ئێرانی بە گوێی خەڵكی جیهان ئاراستە كراوە. 

ئاماژە بەوەشدراوە كە ڕێوڕەسمی بەخشینەوەی نۆزدەهەمین خەڵاتی وومێكس بەو ژەنیارە كوردە لە رۆژی (27) ی ئۆكتۆبەر هاوكات لەگەڵ بیست و پێنجەمین ساڵوەگەری كرانەوەی ئەو ناوەندو خەڵاتە مۆسیقاییە، لە تامپرەی فەنلاند بەڕێوەدەچێت.

كەیهان كەلهور لە هەژماری ئینستاگرامی لەبارەی هەواڵی هەڵبژاردرانی بە باشترین هونەرمەندی ساڵ، نووسی: بردنەوەی خەڵاتی وومێكس بۆ من زۆر گرنگە، ئەو خەڵاتە بە واتای ڕێزنان لە فەرهەنگی دەوڵەمەندی وڵاتەكەم ئێران و هونەری بێ زەمانی پارسییە كە لە شكۆفانوونەو خاوەن ڕێزو خۆشەویستییە لە جیهاندا.

شایانی باسە، لە پووشپەڕی ئەوساڵدا كەیهان كەلهور لە كۆنگرەی ناودرانی كورد كە لە شاری سنەدا بەڕێوەچوو، لە ڕێزی سی ناوداری كورد ڕێزی لێ گیرا.