پەنابەرێكی كورد خەڵاتێكی گرانبەها مسۆگەر دەكات

01/02/2019 - 19:42 بڵاوکراوەتەوە لە هەواڵ/هەمەڕەنگ

 

 

(بەهرۆز بووچانی) پەنابەری كوردی ئێرانی لە دوورگەی مانووس بەنووسینی ڕۆمانێك لە تۆڕی كۆمەڵایەتی (واتس‌ ئاپ) گرنگترین خەڵاتی ئەدەبی وڵاتی ئوسترالیای مسۆگەر كرد.

بەپێی هەواڵێكی رۆژنامەی گاردیان، (بەهرۆز بووچانی) پەنابەری كوردی ئێرانی لە دوورگەی مانووس، بە كتێبی (نیمە هاوڕێیەك جگە لە چیا) خەڵاتی (25) هەزار دۆلاری ڤیكتۆریا وەك گرنگترین و گەورەترین خەڵاتی ئەدەبی ئوسترالیاو خەڵاتی سەد هەزار دۆلاری ئەدەبی ئەو وڵاتەی بردەوە.

(نیمە هاوڕێیەك جگە لە چیا) لە ماوەی (5) ساڵ و لە ناو ئەپڵیكەیشنی واتس‌ ئاپ بە زمانی فارسی نووسراوەو لەلایەن (ئومێد تۆفیقیان) ەوە وەرگێڕادراوەتە سەر زمانی ئینگلیزی.
لێژنەی داوەرانی ئەم خولەی خەڵاتی ڤیكتۆریا لەبارەی ڕۆمانەكەی بووچانی جەختیان لە فۆڕمە جۆراوجۆرەكانی ناو ئەو كتێبە كردووەو ڕایانگەیاندووە، كە لەم ڕۆمانەدا نەریتە جۆراوجۆرەكانی ئەدەبی سەرتاسەری جیهان ئاوێتەی نەریتی ئەدەبی كوردی كراوەو فۆڕمێكی تایبەتكاری بەرهەم هاتووە.

بووچانی كە خەڵكی ئیلامە، ئێستا بۆ شەش ساڵ دەچێت لە دوورگەی مانووس لە نزیكی (پاپۆ ئا گینەی نوێ) لە باكووری ئوسترالیا، چاوەروانی وەرگیرانی بە پەنابەرییەو بەو هۆیە مۆڵەتی بەشداربوونی لە ڕێوڕەسمی وەرگرتنی ئەو خەڵاتە ئەدەبییەی پێ نەدراوە.

ئەم پەنابەرە كوردە لە لێدوانێك بۆ (بی ‌بی ‌سی) هەڵبژادرانی بۆ گرنگترین خەڵاتی ئەدەبی ئوسترالیا وەك هەستێكی نامۆ وەسف دەكاو دەڵێ: لەلایەكەوە بەوە خۆشحاڵم كە دەتوانین سەرەنجەكان بۆ لای دۆخی سەخڵەتمان ڕابكێشێن و ئەمە باشەو لە لایەكی دیكەوە هەست دەكەم كە نابێ بردنەوەی خەڵاتەكە جەژن بگرم، چونكە لێرە هاوڕێیانێكی زۆرم هەن كە لە ڕەنج و سەخڵەتیدان.

وتیشی: یەكەمین شت كە پێویستمانە ئازاد بوونمان لەم سەخڵەتییەو دەربازبوونمان لەم دوورگەیە.

شایانی باسە، ئەم پەنابەرە كوردە پێشتر بە هاوڕێی ئارەش كەماڵی سەروستانی فیلمێكی بەڵگەییان بە ناوی (چۆكا، ئێستا كاتژمێر چەندە؟) لەبارەی ئۆردوگای دوورگەی مانووس دروست كردووە كە توانی چەندین خەڵاتی گرنگ لە ڤیستیڤاڵە نێونەتەوەییەكان مسۆگەر بكات.

 

 

ئـ . كـ