ئەگەر 100 ساڵ كەمتربی ناتوانی جگەرەبكێشی

06/02/2019 - 11:14 بڵاوکراوەتەوە لە هەواڵ/هەمەڕەنگ

 

 

پەرلەمانتارێكی دیموكراتی ناوخۆیی ویلایەتی (هاوای بیر) لە ئەمریكا پرۆژە یاسایەك بۆ رێگرتن لە كوشندەترین ئامێر لە مێژووی مرۆڤایەتی پێشكەش بە پەرلەمانی وڵاتەكەی دەكات.

پاش ئەوەی یاسادانەرێك پرۆژە یاسایەكی پێشكەشكرد، كە رێ لە فرۆشتنی جگەرە دەگرێت بەهەر كەسێك كە تەمەنی لەخوار (100) ساڵەوە بێت، رەنگە پێویست بكات جگەرە كێشانی ویلایەتی هاوای لە ئەمریكا ماوەیەكی زۆر چاوەڕێ بكەن بۆ ئەوەی یەكەم جگەرە بكێشن.

یاساكە كە لەلایەن پەرلەمانتاری دیموكراتی ناوخۆیی هاوای (ریچارد كریگەن) ەوە پێشكەشكراوە، بە هاتنی ساڵی (2024) بە شێوەیەكی كاریگەر، دەگاتە ئاستی قەدەغەكردنی جگەرە.

هەرچەندە لە ئێستادا هاوای هەندێك لە توندترین یاساكانی پەیوەست بە فرۆشتنی جگەرە پەیڕەو دەكات، بەڵام بەگوێرەی پرۆژە یاساكەی كریگەن كە هاوكات پزیشكێكی ژوری فریاكەوتنیشە، لەو بڕوایەدایە كە پێویستە زیاتر بكرێت بۆ قەدەغەكردنی (كوشندەترین ئامێر لە مێژووی مرۆڤایەتیدا).

كریگەن بە رۆژنامەی هاوای تربیون هێراڵدی راگەیاندووە: لەبنەڕەتدا ئێمە كۆمەڵێك كەسمان هەیە بە شێوەیەكی زۆر ئاڵوودەبوون، بە بۆچوونی من كراونەتە كۆیلەی پیشەسازییەكی خراپی گاڵتەجاری، كە لەڕێگەی دروستكردنی جگەرەیەك كە تا ئێستێكی بەرز ئاڵودەكەرە، ئەو كەسانەی كردۆتە كۆیلە، دەشزانن كە زۆر كوشندەیە.

بەگوێرەی ئەو یاسایەی لە ئێستادا لە هاوای كاری پێدەكرێت، ئەگەر بتەوێت جگەرە بكڕیت، پێویستە لانیكەم تەمەنت (21) ساڵ بێت، بەڵام بەگشتی لە سەرتاسەری ویلایەتە یەكگرتووەكانی ئەمریكا كەمترین تەمەن بۆ ئەو مەبەستە (18 – 19) ساڵە.
پرۆژەكەی كریگەن، داوا دەكات كەمترین تەمەنی كڕیاری جگەرە لە ساڵی داهاتوو بۆ 30 ساڵ و لە 2021 بۆ 40 و لە 2022 بۆ 50 و لە 2023 بۆ 60 و لە 2024 بۆ 100 ساڵ بەرز بكرێتەوە.
كریگەن هەر بۆ رۆژنامەی ناوبراو، دانیشیناوە بەوەی خودی خۆی لە سەردەمی خوێندنی پزیشكیدا جگەرەی كێشاوە، دەشڵێت : ویلایەت پابەندە بە پاراستی تەندروستی گشتی، بۆ نموونە ئێمە رێگەنادەین خەڵك بە ئازادی دەستی بگات بە ماددە ئەفیونییەكان، یان هەر دەرمانێك كە پسوڵەی پزیشكی لەگەڵدا نەبێت.
"ئەمە كوشندەترەو لە هەموو دەرمانێكی بێ پسوڵە ترسناكترەو زیاتر ئاڵودەكەرترە".
بەگوێرەی سەنتەرەكانی كۆنتڕۆڵكردن و بەرگرتن لە نەخۆشی، جگەرەكێشان لە ئەمریكا هۆكاری سەرەكی ئەو نەخۆشیانەیە كە دەكرێت رێیان لێبگرێت، ئەمانەش كۆمەڵێك نەخۆشین كە ساڵانەی مردنی نزیكەی نیو ملیۆن كەسی لێدەكەوێتەوە.

وەرگێڕانی لەئینگلیزییەوە: والی عەلی