ناسا دەگەڕێتەوە بۆ سەر مانگ

12/03/2019 - 09:20 بڵاوکراوەتەوە لە هەواڵ/هەمەڕەنگ

 

 

بەر لە دوو ڕۆژ ئاژانسی ناسا زانیاری زیاتری خستەڕوو دەربارەی پڕۆگڕامی گەشتەكان بە مرۆڤەوە لە داهاتووێكی نزیك بۆ مانگ و هەسارەی مەریخ، لە زانیارییەكان دەریدەخات كە لەساڵی (2023) گەشتی مرۆڤ بۆ مانگ ئەنجامدەداتەوە، لە یەكەم گەشت و دووەم گەشتدا لەوانەیە كەشتیەوانەكان تەنیا بە دەوری مانگ بسوڕێنەوە بۆ دڵنیابوون لەو سیستەمە نوێیەی كە بەم دواییە دروستكراوەو ئێستا تاقی دەكرێتەوە، هەروەها لە زانیارییەكان ئاماژە بەوە كراوە لەساڵی (2018) هەموو پارچەو پێداویستییەكانی ئەو گەشتانە دروستكراون و تاكو ساڵی (2020) هەموویان زۆر بە ووردی تاقی دەكرێنەوە، بەشی سەرەكی گەشتەكان كەشتیەكەیە كە ناسا ناوی لێناوە (ئۆڕایۆن).

ئەو كەشتیە بە شێوەو دیزاینێكی نوێ دروستكراوەو بۆ گەشتەكانی مرۆڤ بەكاردەهێنرێت بۆ خولگە بەرزەكان، واتە مانگ لە ئێستاداو هەسارەكان لە داهاتووداو بە وردی گەشتی مرۆڤ بۆ هەسارەی مەریخ لە سەرەتاو ناوەراستی سیەكانی ئەم سەدەیە.

بەشی سەرەكی دووەمی ئەو گەشتانە موشەكەكەیە، بەپێی زانیارییەكانی ناسا ئەو موشەكە گەورەترینیان دەبێت تاوەكو ئێستا ناساو مرۆڤ دروستی كردبێت و بەكارهێنرابێت بۆ گەشتەكانی بۆشایی ئاسمان، موشەكەكە ئەوەندە گەورە دەبێت لە چوار قۆناغ پێك دێت، بۆچوونەكان وایە كە هۆكاری گەورەیی و بەهێزی ئەو موشەكە بۆ ئەوە دەگەڕێتەوە كە ناسا لەگەڵ گەشتەكان كەل و پەل و كەرەستەیەكی زۆر دەنێرێت بۆ سەر مانگ بۆ دروستكردنی بنكەیەكی بچووكی بەردەوام بۆ مرۆڤ لەسەر مانگ، بۆ ئەوەی بەشێوەیەكی سەرەكی بەكاربهێنرێت وەكو (Relay.Station) یان وێستگەیەكی پاڵپشتیكردن و پەیوەندیكردن لە گەشتەكانی داهاتووی مرۆڤ بۆ سەر هەسارەی مەریخ، لە ڕاستیشدا گرنگیدانی ئەمجارەی ناسا بە مانگ و گەڕانەوە بۆ ئەوێ بە شێوەیەكی سەرەكی لەبەر هەنگاو هاویشتنی مرۆڤە بەرەو قوڵایی ئاسمان و بە تایبەتیش لە ئێستادا بەرەو هەسارەی مەریخ.

لوقمان حەوێز – تێكساس

 

 

 

ئـ . كـ