ناسا وێنەی ئەڵتیما تولی بڵاودەكاتەوە

22/03/2019 - 08:24 بڵاوکراوەتەوە لە هەواڵ/هەمەڕەنگ

 

 

كەشتی نیوهەرایزن لەیەكەم ڕۆژی ئەمساڵ (2019) زۆر لەنزیكەوە بەلای هەسارۆكەی ئەڵتیما تولی Ultima.Thule دا ڕۆیشت و وێنەی گرت، ئەڵتیما تولی هەسارۆكەیەكی بچووكەو دەكەوێتە ناو پشتێنەی كەپیەرو ئەوەندەو نیوی قەزەمە هەسارەی پلۆتۆ لە ئێمە دوورە، ئەمە دوورترین تەنی گەردوونیە بەم شێوەیە لە نزیكەوە بپشكنرێت لەلایەن مرۆڤەوە، كارێكی بێ وێنەیەو جێگەی تێڕامانە ئێمەی مرۆڤ دەستمان گەیشتووە بەو دووریە، هەر بۆ وەبیرهێنانەوەو بۆ ئەوەی مەزەندەی دووریەكەی بكەن كە پترە لە (6.5) ملیار كیلۆمەتر، ئەمەش بەبەراورد دەكاتە (16927) ئەوەندەی دووری مانگ، لێرەشەوە كەشتی نیوهەرایزن بەرەو قوڵایی گەلە ئەستێرەكەمان دەڕوات، دەبێتە جێپەنجەی پێنجەمی مرۆڤ لە گەردوون كە بۆ دەیەها سەدەها ملیۆن ساڵ گەشت دەكات بەرەو قوڵایی بۆشایی نێوان ئەستێرەكانی گەلە ئەستێرەی ڕێی كاكێشان دوای ڤۆیەجەر یەك و دوو و پایۆنیر یەك و دوو.

لەم پشكنینە كەشتی نیو هەرایزن كۆمەڵێك وێنەو زانیاری گرنگی لەسەر هەسارۆكەی ئەڵتیما تولی كۆكردەوەو ناردیەوە بۆ زەوی دوای ئەوەی لێی نزیكبۆوە تا دوری كەمتر لە (3200) كیلۆمەترە.

ئەم هەسارۆكەیە شێوەكەی ڕێك نیە، درێژیەكەی نزیكەی (32) كیلۆمەترەو پانیەكەی نزیكەی (16) كیلۆمەترە، گرنگی ئەنجامدانی لێكۆڵینەوە لەم هەسارۆكەیە لەوەدایە كە لەبەر بچووكی و هەروەها لەبەر ئەوەی زۆر دورە لە خۆر لەوەتەی دروستبوونیەوە لەسەرەتای كۆمەڵەی خۆر بەر لە پتر لە (4.5) ملیار ساڵ هیچ گۆڕانكاریەكی ئەوتۆی بەسەردا نەهاتووە، كەواتە لە ڕێگەی لێكۆڵینەوە لە ئەڵتیما تولی زانیاری زۆرمان دەست دەكەوێت لەسەر سەرەتاكان هەروەها چۆنیەتی دروستبوونی كۆمەڵەی خۆرو گۆی زەوی و هەسارەكانی تریش.

لوقمان حەوێز – تێكساس