نهێنیە گەورەكانی گەردوون هێشتا گەلێك زۆرن

14/04/2019 - 09:37 بڵاوکراوەتەوە لە هەواڵ/هەمەڕەنگ

 

 

بەپێی پێوەرە گەردوونیەكان بێت ئێمەی مرۆڤ چاوتروكانێكە دروستبووین، هەرچەندە ڕۆژ بەڕۆژو ساڵ بەساڵیش زۆرتر فێردەبین دەربارەی ئەم گەردوونە فراوانەو سەرسوڕهێنەرەو وردەكاریەكانی، بەڵام لەگەڵ هەموو دەستكەوتەكان و بازدانەكان هێشتا سات بەسات پرسیاری قورستر دێنە پێشەوەو توشی دەرگای داخراوی تر دەبین، هەندێك جار خودی ئەو دۆزینەوە گرنگانەی ئەنجامیان دەدەین و بەدەستیان دێنین دەستمان دەگرن و دەمانبەن بەرەو ئەو دەرگا داخراوانە.

وێنەی كونەڕەشەكە پێمان دەڵێت : زۆر زۆر كارمان ماوە ئەنجامی بدەین، چۆن بزانین چی ڕوودەدات لەناو ئەو پانتاییە تاریكەی ناو وێنەكە ؟؟ واتە لەناوەوەی سنوری نەگەڕانەوە ؟؟ یاساكانی ڕێژەیی گشتی تا سنوری ڕووداوەكانی كونەڕەشەكان (Event.Horizon) كاریان پێدەكرێت و دوایی ئیفلیج دەبن، هەرگیز بەو بیردۆزە ناتوانین بزانین لەودیوی ئەو سنورە چی دەگوزەرێت.

ئەی پێش تەقینەوە گەورەكە ؟؟ چۆن لێكدانەوەو پێوانەكانی بۆ بكەین ؟؟ یان بابەتی ووزەو بارستەی تاریك كە تا ئێستا بەهیچ شێوەیەك ناتوانین خۆمان لەقەرەی بدەین، لەبەر ئەوەی جارێ هیچ زانیارییەكی ئەوتۆمان نیە دەربارەی ئەم بابەتانە ناتوانین یاساو بیردۆزی تۆكمە دابڕێژین بۆیان.

لەگەڵ ئەو بازدانە زانستیە هەست دەكەم لەهەموو كاتێك زیاتر پێویستیمان بە بیردۆزێكی تۆكمەی تریشە لەبواری كێشكردن لە جیهانی كوانتەم، لەپاڵ بیردۆزی ڕێژەیی گشتی ئاینشتاین كە هێزی كێشكردن زۆر بەجوانی ڕووندەكاتەوە لەجیهانی فیزیای كلاسیكی، بەڵام ئەو بیردۆزە دەستەوەستان ڕادەوەستێت لە جیهانی كوانتەم و ناتوانرێت بەكاربهێنرێت، كێشەكە ئەوەیە تا ئێستا هێزەكان و بەشەكانی جیهانی كوانتەمیش بەیەكەوە لە یەك بیردۆزی یەكگرتوو ڕێكنەخراون، ئەمەش كارو كاتی زۆری دەوێت، ئاسان نیە، بەڵام لەكۆتاییدا كلیلی وەڵامی پرسیارە قورسەكان لە جیهانی كوانتەم دەبینینەوە.

زۆر گرنگە بیردۆزێكی تر هەبێت كە ڕێژەیی گشتی ئاینشتاین و بیردۆزی كوانتەم بەیەك ئاشنا بكات، لە ئێستا بەریەككەوتن هەیە لەنێوانیان و بەیەكەوە ناتوانن كاربكەن، هەردووكیشیان ڕاستن هەریەكەیان بۆ بوارێك، یەكەمیان لەبواری فیزیای كلاسیكی و دووەمیان بۆ بواری كوانتەم.

لە ئێستادا چەند هیوایەك هەیە، ئەوانیش یەكەم بیردۆزی سترینگە، بەڵام هێشتا كاری زۆر ماوەو نازانین تەواو سەركەوتوو دەبێت یان نا، دووەم كاركردنی زیاترە لەبواری كوانتەم كە ئەمەش جیهانێكی كراوەیەو كاری گەلێك زۆری دەوێت، گەورەترین دەستكەوت و ئامانجی مرۆڤایەتیش لەداهاتوو بریتی دەبێت لە داڕشتنی تەنیا یەك بیردۆزە بۆ هەموو شتێك ...! بەڵام لەبەر ئەوەی كارو بەربەستی گەلێك زۆرمان لەپێش ماوە، بەبڕوای من جارێ ئەم ئامانجە تا ڕادەیەك دوورە، لایەنی كەم جارێ سەد بۆ چەند سەد ساڵێك دوورە لە ئێمە.

لەلایەكی تر ئەو كارە جوانەی خرایەڕوو تێیدا پتر لە (200) زانا لە دەیەها دامەزراوەی زانستی سەر بە (20) ووڵات هەماهەنگیان لەگەڵ یەكتر كرد لەماوەی پتر لە (10) ساڵ بۆ بەرهەمهێنانی یەكەم وێنەی كونێكی ڕەش، گەشبینی پێبەخشیم كە لەسەر ڕێچكەیەكی دروست دەڕۆین لەگەڵ ئەو هەموو كێشەو تەنگ و چەڵەمانەی كە لەئێستادا هەن، دڵنیام ئەگەر لەسەر ئەم ڕێچكەو هەماهەنگیە بەردەوام بین ئەوا هیوا و ئامانجەكانمان خێراترو ئاسانتر دێنەدی.