كۆمەڵێك هەسارۆكە زۆر لەگۆی زەوی نزیك دەبنەوە

02/05/2019 - 09:28 بڵاوکراوەتەوە لە هەواڵ/هەمەڕەنگ

 

 

شەش هەسارۆكە لە دەیەی داهاتوو تەنیا لەماوەی دوو ساڵدا زۆر نزیك دەبنەوە لە گۆی زەوی، بەڵام بەپێی پێوانەكان چاوەڕوان ناكرێت هیچیان بەر گۆی زەوی بكەون، ئەمە لەنێوان ساڵی (2027 – 2029) ڕوودەدات، یەكێكیان بەچاویش دەبینرێت لەشەودا لەو كاتەدا، دووانیان بە دووربین و تەلیسكۆپ دەبینرێن، سیانەكەی تر تەنیا بە تەلیسكۆپ دەبینرێن لەو كاتەدا، گەورەترینیان تیرەكەی نزیكەی (3) كیلۆمەتر دەبێت و پێی دەووترێت (1990 MU)، دووان لەو هەسارۆكانە دووریان لەگۆی زەوی لەمانگ كەمتر دەبێتەوە، یەكێكیان كە پێی دەووترێت (Apophis99942) لە ساڵی (2029) زۆر نزیك دەبێتەوەو دوورییەكەی بۆ ماوەیەكی كەم دەبێتە تەنیا نزیكەی (31) هەزار كیلۆمەتر لە گۆی زەوی، ئەو كاتە وەك ئەستێرەیەكی جوڵاوە دەبینرێت لە ئاسمان بۆ ماوەی چەند كاتژمێرێك، بەڵام ئەویش بەپێی پێوانەكانی ئێستا بەر گۆی زەوی ناكەوێت.

سەرۆكی ئاژانسی ناسا لە ووتارێكیدا لە كۆنفرانسی ئەكادیمیای جیهانی بۆ گەردوونناسی كە دەربارەی پاراستنی هەسارەی زەوی بوو لەبەریەكەوتنی لەگەڵ هەسارۆكەو كلكدارەكان ووتی، كاتی ئەوە هاتووە هەموو زانست بخەینە گەڕ بۆ پاراستنی هەسارەكەمان لەو هەڕەشەیە كە بە دڵنییاییەوە ڕۆژێك مرۆڤایەتی ڕووبەڕووی دەبێتەوە.

بەپێی خەمڵاندنەكانی ناسا تەنیا لە پشتێنەی ناوەوەی هەسارۆكەكان لەنێوان هەسارەی مەریخ و موشتەری پتر لە پێنج ملیۆن هەسارۆكەی گەورەو بچووك هەیە، تا ئێستا توانیومانە نەخشەسازی تەنیا بۆ نزیكەی (18) هەزار لەو هەسارۆكانە بكەین كە لەگۆی زەوی نزیك دەبنەوەو پۆلێن كراون بەپێی مەترسیان لەسەر گۆی زەوی.

لوقمان حەوێز – تێكساس