ئەوەی ئەم زەویە بكێڵێ ژنەكەی دەمرێت

07/05/2019 - 08:56 بڵاوکراوەتەوە لە هەواڵ/هەمەڕەنگ

 

 

زیاتر لە (100) ساڵە كەس ناوێرێت كێڵگەیەك لە ئامێدی بكێڵێت و خۆی بكات بە خاوەنی كێڵگەكە.

ماوەی زیاتر لە (100) ساڵە پارچە كێڵگەیەك لە گوندی (هاریكا شێخا) ی سەر بە شارەدیێ دێرەلووك لە سنووری شارۆچكەی ئامێدی هەیە، بەهۆی بوونی چەند چیرۆكێك و رووداو كەس ناوێرێت بیكێڵێت، چونكە گوایە ئەوەی بیكێڵێت ژنەكەی دەمرێت.

(نژیار هاریكی) مامۆستاو خەڵكی گوندی (هاریكا شێخا) بە وشەی راگەیاندووە، بەهۆی بوونی چەند رووداو و چیرۆكی تایبەت بەو كێڵگەوە ماوەی زیاتر لە (100) ساڵە كەس ناوێرێت كێلگەكە بكێڵێت.

زیاتر وتی، كێڵگەكە ناوی (زەڤیا ژن مریێ) كێڵگەی (ژن مردووە) و دەكەوێتە ناوەراستی چەمێ گوندەكەمان و زەوییەكی ئاودێرییەو (200) مەتر دریژەو (50) مەتریش پانە، هەروەها یەكێكە لەو زەویانە كە خاكێكی بەپیتی هەیەو زۆریش گونجاوە بۆ چاندنی برنج و كونجی و هەموو جورێكی تری لە دانەوێڵە.

بەپێی قسەی هاریكی بێ، جگە لەوەی كە كەس ناوێریت بیكێڵێت، هاوكات كەس ناوێرێت خوی بە خاوەنی زەوییەكەش بزانێت، جگە لەوەیش ئێمە وەكو خەڵكی گوند رێگری لە كەس ناكەین كە زەوییەكە بكێڵێت، بەڵام لەگەڵ ئەوەش خۆمان بەرپرسیار نابینین ئەگەر كەسێك زەوییەكەی كێڵاو ژنەكەی ئەو یا كەسێكی تر لە خێزانی ئەوان بمرێت.

(نژیار هاریكی) دوو رووداوی ناسراو و سەر زاری خەڵك گواستەوەو رایگەیاند، رۆژێك هاوڵاتییەكی مەسیحی هاتە نزیك گوندی ئەوان و دواتر كێڵگەكەی كێڵا بۆ ماوەی (12) ساڵ، بەڵام دواتر (12) كەس لە یەك ساڵدا لە خێزانی ئەوان مردن، هەروەها رۆژێكی تر كەسێك ئەو كێڵگەیە بۆ پاككردنی برنجی خۆی بەكارهێنا، هەر لەو رۆژە كورەكەی لە شاخدا فڕی و گیانی لەدەستدا.

ڕوونیشی كردەوە، لەرووی زانستیەوە هیچ بنەمایەك بۆ مردنی ژن و كەسێك لە خێزانی ئەو كەسە بەهۆی كێڵانی كێڵگەكەوە نییە، بەڵام لەبەر ئەوە ترسێكی زۆر لەناو خەڵكدا بڵاوبۆتەوەو لە ڕووی كۆمەڵاتییەوە خوێندنەوەی جیاوازی بۆ كراوە كەس ناوێرێت بیكێڵێت.