یەك ملیۆن گیانلەبەرو رووەك هەڕەشەی لەناوچوونیان لەسەرە

07/05/2019 - 09:34 بڵاوکراوەتەوە لە هەواڵ/هەمەڕەنگ

 

 

ڕاپۆرتێك لەلایەن نەتەوە یەكگرتووەكان بڵاوكرایەوەو دەڵێت: بەهۆی مرۆڤەوە یەك ملیۆن جۆری ڕووەك و زیندەوەران هەڕەشەی لەناوچوونیان لەسەرە لە (10) ساڵی داهاتوودا.

بەداخەوە هۆمۆسێیپیان كەخۆی بەپیاوە ئاقڵەكەی گۆی زەوی دادەنێت لە ئێستادا زۆر گێلانە ڕەفتار دەكات، هەندێك بیری لێبكەنەوە، یەك ملیۆن جۆر لە زیندەوەران كە كۆمەڵێكی زۆر لە شیردەرەكان، مێروو و باڵندەكان، ڕووەكەكان و گیاندارە ئاوییەكان دەگرێتەوە هەڕەشەی نەمانیان لەسەرە بەهۆی چاڵاكییەكانی مرۆڤەوە تاوەكو (10) ساڵی داهاتوو، هۆكارە سەرەكیەكان بریتین لە: زۆربوونی چاڵاكییەكانی مرۆڤ بەگشتی و زۆربوونی ئەو ڕووبەرەی داگیری دەكات بۆ خۆیی و ئاژەڵە ماڵییەكانی، پیسبوون و كاریگەری مرۆڤ لەسەر ژینگەی (75%) لە ڕووبەرە ووشكاییەكانی گۆی زەوی، زێدەڕۆیی لە ڕاوكردنی ماسی و گیاندارە ئاوییەكان، تەختكردنی دارستانەكان و بەرتەسك كردنەوەی ڕووبەری ژینگەیی گیانداران ساڵانە بەڕێژەیەكی گەورە، سەرهەڵدانی دیاردەی گۆڕانی كەش و هەواو گەرمبوونی گۆی زەوی كە ئەویش هۆكارەكەی مرۆڤە.

چی كراوەو چی دەكرێت ؟

بەپێی پێشبینیەكانی ڕاپۆرتەكەی دوێنێی نەتەوە یەكگرتووەكان كە لەلایەن (145) پسپۆڕو شارەزای ژینگەو بایۆلۆژی ئامادەكراوە لە (50) ووڵات دوای سێ ساڵ لێكۆڵینەوە، بەداخەوە زۆر ئەستەمە هیچ هەنگاوێكی كاریگەر بگیرێتەبەر بەتایبەتی لەداهاتووێكی نزیك.

 

لوقمان حەوێز – تێكساس