لەڕێگەی بەرمیلێكەوە زەریاییەكی بڕیوە

12/05/2019 - 08:40 بڵاوکراوەتەوە لە هەواڵ/هەمەڕەنگ

 

 

مەلەوانێكی فەرەنسی تەمەن (72) ساڵ بە زیاتر لە چوار مانگ لە نێو بەرمیلێكدا زەریای ئەتڵەسی بڕی، چۆن خۆڕاگرییەكە، تەنها بۆ گەیشتن بە ئامانجەكەی چ مەترسیەكی بڕیوە.

ماڵپەڕی (سی ئێن ئێن) بڵاویكردۆتەوە، (جان جاك سافین) لە نێو كەپسولێك كە لە شێوەی بەرمیلە نەوتە، لەكانونی یەكەمی ساڵی (2018) ەوە لە دورگەی هیرۆ لە كەنارە ئاوییەكانی ئیسپانیا بەڕێكەوت لە زەریای ئەتڵەسیداو چوار هەزارو (500) كیلۆمەتری بە ماوەی (122) ڕۆژ بڕیوە. سافین لە نێو زەریای ئەتڵەسی پشتی بە شەپۆڵەكانی ئاو بەستووە بۆ ڕۆیشتن و بڕینی ئەو ماوە زۆرە.

سافین لە تۆڕی كۆمەڵایەتی فەیسبووك ڕوونیكردۆتەوە، لەسەرەتادا كەشتیەكی نەوت هەڵگری هۆڵەندی لە دەریای كاریبی لەگەڵ خۆی بردوویەتی بەرەو دورگەی (سینت ئۆستایۆسی بچووك) لە هۆڵەندا.

دەشڵێت، دوای چەند ڕۆژێك كەشتیەكی فەرەنسی كەوتەڕێ و بەهۆی شەپۆڵەكانیەوە بەرمیلەكەی بەرەو دورگەی مارتینیگ لە دەرەوەی فەرەنسا ئاڕاستەكەی گۆڕی.

وتیشی، دوای گەیشتنی بە دورگەكە سافین ڕایگەیاند، هەرچەندە گەشتەكەی خۆش بووە، بەڵام مەترسی زۆریشی هاتۆتە ڕێگا.

سافین كە پێشتر پەڕەشوتوانی سەربازی بووە ڕایگەیاند، زیاتر لە چوار مانگ لە نێو بەرمیلەكە بووە كە درێژیەكەی (3) مەترو پانیەكەی (2) مەترو (10) سەنتیمەتر بووە.

سافین لە نێو بەرمیلەكە جێگەیەكی خەوتن و شوێنێكی چێشتلێنانی هەبووەو هەروەها لە بەشی خوارەوەی بەرمیلەكەی پەنجەرەیەكی بچووكی هەبووە كە تەماشای ماسییەكانی نێو ئاوەكەی كردووە.

ماڵپەری سی ئێن ئێن ئاماژەی پێكردووە، بەرمیلەكە بەشێوەیەك دروستكراوە كە بەرگەی شەپۆڵی ئاوو گیانلەبەرە ترسناكەكانی زەریا بگرێت، هەروەها شانەیەكی تایبەتی تیشكی خۆری هەیە كە وزەی كارەبا بەرهەمدێنێت تا بتوانێت پەیوەندییەكان وەربگرێت و دانەبڕێت و شوێنەكانیش دیاری بكات.

لە گەشتە دوورو درێژەكەیدا سافین پشتی بە خۆراكی وشك بەستووە، لەگەڵ ماسی فرێش كە ڕاوی كردووەو لەگەڵ ئەو هاوكاریانەی كە لەلایەن كەشتییەكانەوە پێی دەدرا كاتێك بە تەنیشتیا تێپەڕ دەبوون.