حەوت ساڵە گالیسكەی كریاسیتی لەسەر هەسارەی مەریخە

13/08/2019 - 10:38 بڵاوکراوەتەوە لە هەواڵ/گشتی

وێنەی دووەم لەخوارەوە كە دەیبینن بەو كامیرایە چركێنراوە كە لەسەر گالیسكەی گەڕۆكی كریاستی قایم كراوە لە ڕۆژی 18 ی حوزەیرانی ئەمساڵ 2019...

لەوەتەی لەسەر ڕووی هەسارەی مەریخ نیشتۆتەوە ئەم كارانەی ئەنجامداوە:

حەوت ساڵە گالیسكەی كریاسیتی لەسەر هەسارەی مەریخە پتر لە (21) كیلۆمەتر لە چەم و كەندی Gale.Crater جوڵاوەتەوە، لەگەڵ جوڵانەوەی لەو ماوەیەدا هەزارەها وێنەی زۆر وردی بەردو گڵ و شوێنەواری ئەوێی چركاندووەو ناردۆتەوە، جگە لە كامێرا دیجیتاڵیە ئاساییەكان، كریاسیتی كامێرایەكی مایكرۆسكۆپیشی لەسەرە كە بەباڵێك لە بەردەكانی ئەو شوێنە نزیك دەبێتەوەو هەزارەها وێنەی مایكرۆسكۆپی ئەو بەردانەی چركاندووەو ناردۆتەوە، لەڕێگەی ئەو وێنە مایكرۆسكۆپیانە دەزانین ئەو بەردانە چۆن دروستبوون و لەچی پێكهاتوون.
تاوەكو ئێستا (22) چاڵی بچووكی هەڵكەندووە، پشكنێنی بۆ پێكهاتەی كیمیایی ئەو نمونانە كردووە.
هەرە گرنگترین دۆزینەوەكانی كریاسیتی چی بووە تاوەكو ئێستا ؟؟
ئەم گالیسكە گەڕۆكەی سەر مەریخ سەلـماندی كە پێش پتر لە سێ ملیار ساڵ واتە سێ هەزار ملیۆن ساڵ ئاوی شل و ڕۆیشتوو هەبووە لەو شوێنەی ئێستای لەسەر ڕووی هەسارەكە، هەروەها دۆزینەوەكانی پێمان دەڵێت بارودۆخی ئەوكاتەی سەر ڕووەكەی لەبارو گونجاو بووە بۆ سەرهەڵدان و بوونی ژیانی سەرەتایی یان مایكرۆبی.
بەڵام جارێ دڵنیا نین لەوەی ئایا ئەو كاتە ژیانی سەرەتایی هەبووە لەوێ یان نا، چاوەڕوانین ئەم پرسە لەلایەن كەشتی و گالیسكەی ڕۆڤەر (2020) یەكلایی بكرێتەوە كە لەساڵی (2020) ناسا هەڵی دەدات و لەسەر هەسارەی سوور دەنیشێتەوە.
كریاسیتی چەندەی تر كاردەكات ؟ بەچی كاردەكات ؟
ئەم گالیسكەیە وزەی كارەبای بەردەوام دروست دەكات بۆ جوڵەو ئەنجامدانی چاڵاكیەكانی لەڕێگەی جۆرێك لە بەرهەمهێنەری كارەبا generator كە لەڕێگەی گەرمی ناوكی كارەبا دروست دەكات، كریاسیتی بڕی (4.? كیلۆگرام لەمادەی پلۆتۆنیۆم (238) ی تێدایە كە ماددەیەكی تیشكدەری بەهێزەو بەردەوام گەرمیەكی زۆر دەبەخشێت تا تەمەنی تەواو دەبێت، ئەم كردارە حەوت ساڵە وزە دابین دەكات بۆ كریاسیتی، لەئێستادا پێشبینی دەكرێت سێ بۆ پێنج ساڵی تر وزەی كارەبا دابین دەكات بۆ گالیسكەكە، دوای ئەو ماوەیە چاڵاكیەكانی كەمدەكرێتەوە وردە وردە تاوەكو لەكۆتاییدا بەهۆی نەمانی وزە لەكار دەكەوێت.
گالیسكەی كریاسیتی لە تاقیگە لە قۆناغێكی پشكنیندا پێش ناردنی بۆ سەر ڕووی هەسارەی مەریخ، نوێترین تەكنەلۆژیا بەكارهێنراوە لە دروستكردنی، سەرنجی وردی ئامێرەكان بدەن، ئەو ئامێرانە بەشێوەیەك دیزاین كراون و لە مادەی وا دروستكراون بەرگەی كاركردن بگرن بۆ ئەوەندە ساڵی بێ ئەوەی پێویستی بەچاككردنەوەی گەورە بێت، هەندێك كاری چاككردنەوەی بچووك هەر لەلایەن باڵەكەی خۆیەوە ئەنجامدەدرێت..!

لوقمان حەوێز/ تێكساس