شەپۆڵێكی باران بارین ئیستەنبۆڵ دەگرێتەوە

17/08/2019 - 21:26 بڵاوکراوەتەوە لە هەواڵ/گشتی

 

 

ئەمرۆ شەپۆڵێكی باران بارین ڕووی لەشاری ئیستەنبوڵ لە توركیا كردووە، زۆرێك لە بازاڕو شەقامەكانی ئەو شارە بە ئاو داپۆشراون.

ئەمڕۆ میدیاكانی توركیا بڵاویاكردۆتەوە، ئاو چۆتە ناو تەواوی دوكانەكانی بازارەكانی ئەم شارەو زیانیان پێگەیشتووە.

ئەو بارانە بە خوڕەی زۆربەی ناوچەكانی ئیستەنبوڵی گرتەوە ژمارەیەكی زۆر لە خەڵكی ناچار كرد بچنە ناو وێستگەكانی پاس، شوێنە داخراوەكان و ژێر پردەكان تاكو تەڕ نەبن.

بەم هۆیەوە ژمارەیەك لە ئۆتۆمبێلەكان لە رێگەكان گیریان خواردو لە ناوچەی چاتاڵجاش هەورە بروسكە لە ستونێكی كارەباییداوە.

لەم بارەیەوە پارێزگای ئیستەنبوڵ بە میدیاكانی وڵاتەكەی راگەیاندووە، باران بارینەكە ئەگەری هەیە تا شەوو تەنانەت بەرەبەیانی سبەی بەردەوام بێت، پێشتریش كەشناسی توركیا هۆشداری لە باران بارینی بەخوڕ راگەیاندبوو.

تیمەكانی بەرگری شارستانی ئیستەنبوڵ، خراونەتە حاڵەتی ئامادەباشییەوە بۆ هەر رووداوێكی نەخوازراو كە لەئەنجامی ئەو باران بارینە بكەوێتەوە.