ئەمریكا : فشارەكانی سەر ئێران بەردەوام دەبن

15/05/2019 - 08:45 بڵاوکراوەتەوە لە هەواڵ/گشتی

 

 

وەزیری دەرەوەی ئەمریكا دەڵێت، بە هاوتا ڕووسیایەكەی گوتووە: وڵاتەكەی بەردەوام دەبێت لە فشارەكانی بۆ سەر ئێران هەتا ڕێبەرایەتی ئەو وڵاتە ئامادەدەبن وڵاتەكەیان بێتەوە ڕیزی ئەو وڵاتانەی هەست بە بەرپرسیارێتی دەكەن و هەڕەشە لە وڵاتانی دراوسێ ناكات.

(مایك پەمپـیۆ) وەزیری دەرەوەی ئەمریكا لە میانەی كۆنگرەیەكی ڕۆژنامەوانی هاوبەش لەگەڵ (سێرگێی لاڤرۆڤ) وەزیری دەرەوەی رووسیا لەشاری مۆسكۆ وتی، ئەمریكا دەیەوێت ئێران وەك وڵاتێكی ئاسایی ڕەفتار بكات و وازبهێنێت لە هەڵدانی موشەك و تیرۆركردن لە ئەوروپاو پشتیوانیكردنی حزبولڵاو حوسیـیەكان.

سەبارەت بە جموجۆڵە لەشكریـیەكانی ئەمریكا لە ناوچەكە، وەزیری دەرەوە ئامادە نەبوو هیچ وردەكاریـیەك بدات، بەڵام وتی: ئەگەر بێت و هێرشبكرێتە سەر بەرژەوەندیـیەكانی ئەمریكا، ئەوا ئەمریكا بە شێوەی گونجاو وەڵام دەداتەوە.

لاڤرۆڤ لەم بارەیەوە لای خۆیەوە وتی، گرنگە ڕووبەڕووبوونەوەی لەشكری ڕوونەدات و كێشەكان بە ڕێگەی دیپـلۆماسی چارەسەربكرێن، پاشان وتی: كشانەوە لە ڕێكەوتنە ناوكیـیەكە كارێكی هەڵەیە.

وتیشی: هیوادارە لەگەڵ چین و ئەوروپایـیەكان كە ئەوانیش بەشێكن لە ڕێكەوتننامە ناوكیـیەكە هەوڵبدەن لەگەڵ ئەمریكا تاوەكو ڕێگەچارەیەك بۆ كێشەكە بدۆزنەوە.