چۆن ددانمان بشۆین، ئەم زانیارییانە بزانن

10/07/2019 - 08:37 بڵاوکراوەتەوە لە هەواڵ/تەندروستی

 

 

 

 

پێویستە ڕۆژانە لانی كەم دووجار ددانەكان بشۆرین، لەوەش گرنگتر پێویستە بزانین چۆن ددانەكانمان دەشۆین، بۆ ئەوەی دڵنیابین كە هەموو ڕووەكانی ددانەكە بە تەواوی پاك بۆتەوە:

سەرەتا فڵچەكە بە گۆشەی (45) پلە لە كوتایی پووك واتە هێڵی یەكگرتنی پووك و ددانەكە دادەنێین و بەشێوەیەكی خولانەوە بەرەو خوارەوە دەیجوڵێنین.

پێویستە ددانەكان (لەسەرەوەو خوارەوە) بۆ شەش بەش دابەش بكرێت، ددانەكانی سەرەوە بۆ 3 بەش لای ڕاست پێشەوە، لای چەپ وە ددانەكانی خوارەوەش بەهەمان شێوە، هەر بەشێك پێویستە (8 – 10) جار فڵچەكەی پێدا بهێنرێت.

بەشێوەكی گشتی ئەگەر ددان شتن بە شێوەیەكی ڕێك و پێك بە لەسەر خۆیی بكرێت لانی كەم 3 خولەك دەخایەنێت.

هەنگاوەكانی ددان شتن:

1. سەرەتا بە شوشتنی ڕووی ددانەكانی سەرەوە دەست پێدەكات، سەرەتا لای چەپ ناوەڕاست، پاشان لای ڕاست. 

2. هەمان هەنگاو بۆ ددانەكانی خوارەوە دووبارە دەكەینەوە. 

3. پاش ئەوەی كە دڵنیابووین كە ڕووی دەرەوەی ددانەكان پاك بۆتەوە دەست دەكەین بەشوشتنی ڕووی ناوەوەی ددانەكان لە چەپ بۆ پێشەوە پاشان بۆ لای ڕاست. 

4. هەمان هەنگاو بۆ ددانەكانی خوارەوە دەكرێت. 

5. شوشتنی سەر ڕووی ددانەكان (سەرەوەو خوارەوە). 

چۆن بتوانین باشترین فڵچەی ددان هەڵبژێرین ؟؟

بێگومان جۆری ئەو فڵچەیەی هەڵیدەبژێرین كاریگەری هەیە لە باشتر پاككردنەوەی ددانەكان، چاكتر وایە ئەو فڵچەیەی كە هەڵیدەبژێرین:

1. سەرێكی بچووكی هەبێت كە ئەمەش یارمەتیدەرە بۆ ئەوەی فڵچەكە بگاتە بەشی پێشەوەی ددانەكانی دواوەو ناوچەی نێوان زمان و بەشی ناوەوەی ددانەكانی دواوەی خوارەوە. 

2. ڕیشاڵەكانی نەرم بن و كۆتاییەكانیان خڕبێت، بەكارهێنانی فڵچەی ڕیشاڵ زبرو ڕەق و ڕیشاڵ ئەستوور دەبێتە هۆی برینداربوونی پووك و داخورانی عاجی ددانەكە (واتە ڕووكاری دەرەوەی ددانەكان). 

3. دەسكی فڵچەكە باشتر وایە گونجاو بێت و هەڵگرتنی ناخۆش نەبێت.

هەندێك تێبینی لەسەر فڵچەی ددان و مەعجوونی ددان:

1. باشتر وایە هەر سێ مانگ جارێك فڵچەكەت بگۆرێت، یان هەر كاتێك كە بینیت ڕیشاڵەكانی فڵچەكە تووشی داخوران بوون. 

2. فڵچەی نوێی ددان (30%) كاریگەری زیاترە لە پاككردنەوەی ددانەكان لەو فڵچانەی كە ڕیشاڵەكانی داخوراون، سەرەڕای ئەوەش ئەو فڵچانەی كە تووشی داخوران هاتوون زیان بە پووك و ددانەكان دەگەیەنن. 

3. بەهیج شێوەیەك فڵچەی ئەندامانی تری خێزانەكەت بەكار مەهێنە، چونكە هۆكارێكە بۆ بڵاوبوونەوەی نەخۆشیەكانی ناودەم. 

4. باشتر وایە ئەو مەعجوونانە بەكاربهێنرێن كە مادەی فلۆرایدی تێدایە، فلۆراید ئەو پێكهاتەیەیە كە دەتوانێت ڕێگە لە كلۆربوونی ددانەكە بگرێت.

بەكارهێنانی داو (پەت) ی پزیشكی بۆ نێوان ددانەكان:

بەكارهێنانی فڵچەی ددان تەنها (60%) ی پلەگی ددان لادەبات لەسەر ڕووی ددانەكان، لەكاتێكدا ئەم پلەگە لە نێوان ددانەكانیشدا دروست دەبێت، لەبەرئەوەی پێویستە داوی پزیشكی بەكار بهێنرێت بۆ پاككردنەوەی نێوان ددانەكان لە پلەگی ددان و پاشماوەی خۆراك.