زانیوتانە نێرگلە ژەهر هەڵدەمژێت

13/03/2019 - 09:48 بڵاوکراوەتەوە لە هەواڵ/تەندروستی

 

 

كێشانی نێرگلە دەبێتە هۆی هەڵمژینی ماددەی كیمیایی ژەهراوی كە زیان بە دڵ دەگەیەنێت.

ڕێكخراوی ئەمریكی تایبەت بە دڵ هۆشداریدا كە لە توێژینەوەیەك دەركەوتووە، كێشانی نێرگلە كاریگەری هەیە لەسەر لێدانی دڵ و پەستانی خوێن و مەترسی زیاد بوونی نەخۆشیەكانی دڵی هەیە.

كێشانی نێرگلە، ئەگەری ئەوەی هەیە تووشی شێرپەنجەت بكات، بەقووڵی كێشانی نێرگلە ڕاستەوخۆ كار لەسییەكانی مرۆڤ دەكات، چونكە ئەو دوكەڵەی هەڵی دەمژێ پێكهاتووە لەچەندین ماددەی ژەهراوی و لەهەمووی مەترسیدارتر یەكەم ئۆكسیدی كاربۆنە زیانی گەورەی هەیە لەسەر سییەكان و میزەڵدان و دەم، كێشانی نێرگلەیەك بۆ ماوەی سەعاتێك، هێندەی كێشانی (100 – 200) جگەرە زیانمەندە.

هەروەها لەبەر بەكارهێنانی خەڵووزو گەرمییەكی زۆر، دووكەڵی نێرگلە زیاتر زیان بەسیی و قورگ دەگەیەنێت.

(ئارونی باتانگاری) نووسەرو پڕۆفیسۆری زانكۆی پزیشكی لویسڤیلای ئەمریكی دەڵێت: زۆر لە گەنجان باوەریان وایە كێشانی نێرگلە زیانی كەمترە لە جگەرە، چونكە توتنەكەی بە فلتەری ئاودا تێپەر دەبێت، بەڵام هیچ بەڵگەیەكی زانستی پاڵپشتی ئەم بیرۆكەیە ناكات، هەروەها وتیشی : كێشانی نێرگلە مەترسی لەسەر تەندروستی مرۆڤ هەیە وەكو مەترسی تووش بوون بە شەكرەو زیاد بوونی كێش و زیاد بوونی ئەگەری تووش بوون بە نەخۆشییەكانی دڵ و جەڵتەی دڵ. 

پرۆفیسۆر باتانگار ئاماژەی بەوەدا كە كێشانی نێرگلەو جگەرە هەمان كاریگەریان هەیە لەسەر لەش، بەڵام جیاوازییەكە لەوەدایە كە بەهۆی نێرگلەوە لە كاتێكی كەمدا بڕێكی زۆرتر نیكۆتین هەڵدەمژرێت.

 

 

ئـ . كـ