ژەمی بەیانیان بخۆن تاكو قەڵەو نەبن

14/03/2019 - 10:46 بڵاوکراوەتەوە لە هەواڵ/تەندروستی

 

 

توێژینەوەیەكی ئەمریكی دەریخستووە، خواردنی رۆژانەی ژەمی بەیانیان دوورت دەخاتەوە لە قەڵەوی و دەڵێت، ژەمی بەیانیان لە سووكە ژەمە ناتەندروستەكان باشترە.

پزیشكانی زانكۆی (لۆما لیندا) لە كالیفۆرنیا بە هاوئاهەنگی پزیشكانی پەیمانگەی كلینیك و تاقیكردنەوە پزیشكییەكانی لە پەیوەندی نێوان كاریگەری ژەمەكان لەسەر قەڵەوبوونیان كۆڵیوەتەوە.

(د. هانا كاهلیۆڤا) سەرپەرشتیاری توێژینەوەكە لە زانكۆی (لۆما لیندا) دەڵێت، ئەوانەی رۆژانە تەنیا ژەمێك بۆ دوو ژەم دەخۆن، هاوكۆلكەی بارستایی جەستەیان كەمترە، هاوكات ئەوانەی كە زیاتر لە سێ ژەم دەخۆن و لەنێوان ژەمەكان سووكە ژەم دەخۆن، هاوكۆلكەی بارستایی جەستەیان زیاترە، واتە قەڵەوترن.

پزیشكە ئەمریكییەكە دەڵێت، ئەوانەی كە بەشێوەیەكی رێك و بەردەوام، رۆژانە ژەمی بەیانیان دەخۆن، كێشیان كەمترە لەوانەی ئەم ژەمە دەپەڕێنن، ئەمەش چونكە ژەمی بەیانیان زیندە چاڵاكییەكانی جەستە چاڵاك دەكات و وزەیەكی زۆرتری جەستە دەسوتێنێت.

سەبارەت بەشێوازی خواردنی ژەمەكان پزیشكە پسپۆڕەكەی ئەمریكا دەڵێت، باشترە لەنێوان ژەمی بەیانیان و ژەمی نیوەڕۆ لانیكەم (5 – 6) كاتژمێر هەبن.

بەگوێرەی نێوەندی كۆنتڕۆڵكردن و پێشگیریكردن لە نەخۆشییەكانی ئەمریكا نزیكەی (36.5%) ی گەورانی ئەمریكاو (17%) ی منداڵانی ئەو وڵاتە قەڵەون.

قەڵەوی مەترسی تووشبوون بە هەریەكە لە نەخۆشییەكانی دڵ، جەڵتەی مێشك و شەكرەو چەندین جۆری شێرپەنجە زیاد دەكات.

 

 

ئـ . كـ