سوودەكانی تەقاندنی مل بزانن

08/04/2019 - 09:41 بڵاوکراوەتەوە لە هەواڵ/تەندروستی

 

 

كەسانێكی زۆر ڕاهاتوون لەسەر تەقاندی مل بەمەبەستی نەهێشتنی ئازاری مل و كەمكردنەوەی، ئایا سوودو زیانی ئەم كردارە چییە ؟ 

لەوبارەیەوە (د. هەڤین كەمال شاه موحەمەد) پسپۆڕی ئازاری جومگەو ئەكادیمیایی ئەمریكا بۆ ئازار شكاندن ڕایگەیاند: مل تەقاندن بریتییە لە تەقەتەقی بڕبڕەكانی مل، ئەوانیش بەهۆی:

1. لە جومگەی بڕبڕەكانی مل ماددەیەكی شلەمەنی هەیە بۆ ئاسانكردنی جوڵەی ئێسك و ماسولكەو شانەكانی تری دەوروبەری، لەناو ئەم ماددە شلەدا گازی هەمەجۆر هەیە وەك ئۆكسجین و نایترۆجین و دووەم ئۆكسیدی كاربۆن، دەرچوونی ئەم گازانە بەشێوەی بڵق دەنگی تەقەتەق دروستدەكات.

2. جوڵەی جومگەكان: جوڵانی جومگە كاریگەری هەیە لەسەر بەستەرو ژێی ماسولكەكان، پاش كشانی ژێی ماسولكەكان، كاتێك خاودەبێتەوە دەنگی تەقەتەق دروستدەكات.

3. هەوكرنی جومگەكان لە ئەنجامی كەمبوونەوەو نەمانی مرونەتی كڕكڕاگەكان و ڕەقبوونی جومگەكان تەقەتەقی ملی لێدەكەوێتەوە.

4. زیانەكانی تەقاندنی مل : باشتروایە كەس مل نەتەقێنێت بەبێ هۆكار لەبەر بوونی بۆری خوێن و دەمارێكی زۆر لە ناوچەی مل و ئەگەر زیان پێگەیاندنیان، لەكاتی بوونی ئازار یان كێشەیەك لە مل پێویستە سەردانی پسپۆڕێك بكەیت، چونكە كۆمەڵێك مەترسی هەیە هەرچەندە ئەگەری ڕوودانیان كەمە، ئەوانیش.

* سەكتەی دەماغ بەهۆی تەقینی خوێنبەری بڕەبڕەكانی مل.

* دروستبوونی جەڵتە لە بۆری خوێنەكانی مل و دواتر جەڵتەی مێشك.

* كەمبوونەوەو قورسی جوڵەی بڕبڕەكانی مل و زیادبوونی ئەگەری نەخۆشی سەوەفان و هەوكردنی بڕبڕەكانی مل.

* سەوەفانی ئەژنۆ، چونكە لەكاتی تەقاندنی مل زەغتێكی زۆر دەكەوێتە سەر ئەژنۆو تێكچوونی هاوسەنگی مل.

سوودەكانی تەقاندنی مل:

تەقاندنی مل بە یەكێك لە ڕێگەكانی چارەسەری ئازار دادەنرێت، لەوانە:

* كەم كردنەوەو نەهێشتنی ئازاری شەقیقە.

* نەهێشتنی ئازاری مل.

* كەمكردنەوەی پشت ئێشە.

تێبینی: لەبەر زیانەكانی پێویستە لەلایەن پزیشك و پسپۆڕی شارەزا ئەنجام بدرێت.