گرنگترین هەڵە باوەكانی خواردن لە مانگی ڕەمەزان

18/05/2019 - 10:41 بڵاوکراوەتەوە لە هەواڵ/تەندروستی

 

 

ڕۆژی مانگی ڕەمەزان چەندین سوودو بایەخی گرنگی هەیە بۆ تەندروستی مرۆڤ؛ بەڵام جێگەی داخە لە ماوەی چەند ساڵی ڕابردوود كۆمەڵێك خوو و هەڵسو كەوت و بۆچوونی هەڵە لە ناو زۆرینەی كۆمەڵگە بڵاوبۆتەوە كە دەرئەنجامی خراپی هەیە بۆ تەندروستی مرۆڤ. 

گرنگترین هەڵە باوەكانی خواردن لە مانگی ڕەمەزان : 

• هەڵەكانی ژەمی پارشێو ؛ 

1. پارشێو نەكردن، پارشێو ژەمێكی گرنگەو نابێت پشتگوێ بخرێت و چەند بتوانرێت درەنگتر بخورێت پێش بانگی بەیانی. 

2. خواردنی بڕێكی زۆر خۆراك بە تایبەت خۆراكی چەورو شیرینی و سوێر. 

3. خواردنەوەی بڕێكی زۆر ئاوو شلەمەنی بە مەبەستی ئەوەی تینووت نەبێت لە رۆژەكەدا. 

• هەڵەكانی كاتی بەربانگ ؛ 

1. خواردنەوەی شەربەتی گیراوەو خواردنی شیرینی وەك لوقمەقازی و شیرینیەكانی تر.

2. خواردنی بڕێكی زۆر خۆراك بە تایبەت خۆراكی چەور لە ماوەیەكی كەم و بە پەلە. 

3. پاڵ كەوتن پاش بەربانگ كردنەوە. 

4. نەخواردنی زەڵاتەو سەوزەو شۆربا لە سەرەتای بەربانگكردنەوە. 

5. خواردنی برنج و شلە (بە تایبەت برنج سپی) ڕۆژانە. 

6. نەخواردنی میوە بە بڕی پێویست لە نێوان بەربانگ و پارشێو. 

7. خواردن بە دیار تەلەفزیۆنەوە. 

8. نەجوڵان و سستی و وەرزش نەكردن پاش ڕۆژوو شكاندن؛ هەروەها ئەنجامدانی وەرزشی قورس و بۆ ماوی دوورو درێژ لەكاتی بەڕۆژوو بووندا.

9. شەونخوونی و بەخەبەربوون لە بەربانگەوە تا پارشێوو خەوتن بەرۆژ. 

10. خواردنی شیرینی ڕاستەوخۆ دوای بەربانگ؛ پێویستە دوای دوو سەعات بێت و هەفتەی (1 – 2) جار زیاتر نەخورێت. 

11. خواردنەوەی بڕێكی زۆر چاو قاوەو ئەو خواردنەوانەی كاڤینیان تێدایە. 

12. خواردنی بڕی زۆر لە ترشیات و خواردنی بەهاراتی زۆر تێدا بێت.

(د. كامەران رەسوڵ ژاژڵەیی – پسپۆڕی زانستی خۆراك و نەشتەرگەری گشتی)