بۆ چارەی ئەم نەخۆشیانە، گێلاس بخۆن

23/05/2019 - 09:47 بڵاوکراوەتەوە لە هەواڵ/تەندروستی

 

 

زانایان پێیانوایە گێلاس دەبێتە یەكێك لە هۆكارەكان بۆ چارەسەركردنی نەخۆشانی توشبوو بەشەكرە، هاوكات لە توێژینەوەیەكدا لەسەر سوودەكانی گێلاس زانایان ڕوونی دەكەنەوە، میوەی گێلاس چەندین سوودی بۆ جەستە هەیەو كانزاكانی كالیسیۆم، فۆسفۆر، پۆتاسیۆم، مەگنزیۆم لە خۆ دەگرێت.

لە توێژینەوەكەدا دەركەوتووە، كە گێلاس خاوەنی چەورییەكی كەم و ڕیشاڵی زۆرە، وە بۆ رێكخستنی خوێن لە سیستەمی هەرسكردن زۆر بەسوودە، ژەهری لەش دەردەكات و بۆ كاركردنی ریكووپێكی دڵ و ریخۆڵەو گەدە زۆر بەسوودە. 

هەربۆیە پسپۆرێكی خۆراكی لەبارەی گێلاسەوە وتی: گێلاس ئارەزووی خواردن زیاد دەكات، ئارامبەخشەو ئارامی بە مێشك دەدات و هێزی فكری زیاد دەكات و هۆكاری ڕووخۆشییەو یارمەتیدەرە بۆ دابەزاندنی كێشی لەش و ڕێگرە بۆ توشبوون بە هەوكردن، یەكێكە لەو میوە ناسكانەی پریەتی لە مادە كانزاییەكانی وەك (كالیسیۆم، فۆسفۆر، پۆتاسیۆم، مەگنزیۆم، گۆگرد، ئاسن، مس، كۆپالت، تۆتیا).

لەگەڵ ئەوانەشدا گێلاس زۆر سوودمەندە بۆ ئەو كەسانەی نەخۆشی رۆماتیزم و گرێی جومگەكانیان هەیە، هاوكات گێلاس بۆ توشبوان بە نەخۆشی بەردی گورچیلەو بەردی زراو زۆر سودمەندەو گێلاس خوێن و گەدەش پاك دەكاتەوە، بۆیە پێویستە رۆژانە (250 – 350) گرام بۆ یەك ژەمی خواردن بەكاربهێنرێت بۆ ئەو كەسانەی دەیانەوێت سوودی لێ ببینن.

لە (100) گرام گێلاسدا بڕی (70) كالۆری، (82) گرام ئاو، (14 – 18) ملیگرام كاربۆهیدرات، (1.8) ملیگرام پڕۆتین، (25) ملیگرام پۆتاسیۆم، (25) ملیگرام كالیسیۆم، (18) ملیگرام ڤیتامین سی تێدایە، گێلاس سەرەتا لە وڵاتی سویسرا دۆزرایەوە، دواتر بەوڵاتانی ئەڵمانیاو فەرەنسادا بڵاوبوویەوە، پاشان هێنراوەتە وڵاتانی ئاسیا.

ئەژین عەبدولڵا – هەولێر