تەندروستی سلێمانی ئامادەكاریەكانی بۆ ڕۆژانی جەژن ڕاگەیاند

04/07/2016 - 09:34 بڵاوکراوەتەوە لە هەواڵ/كوردستانی

بەڕێوبەری گشتی تەندروستی سلێمانی ڕایدەگەیەنێت: لە ڕۆژانی جەژندا لە ئامادەباشیدا دەبین و لە شوێنە گشتی و ناو بازاِدا تیمەكانمان ئامادە دەبەن و لە مەرزەكانیشدا ڕێوشوێنی پێویست دەگریتەبەر بەمەبەستی ڕێگری كردن لە هێنانی خۆراكی خراپ.

 

د.میران محەمەد بەڕێوبەری گشتی تەندروستی سلێمانی لە كۆنگرەیەكی ڕۆژنامەوانیدا ڕایگەیاند:" پلانەكانمان بەمەبەستی سەلامەتی و پاراستنی تەندروستی گشتی هاولاتیانە، لە پشووەكانی عارفەو جەژنی ڕەمەزانیشدا وەك هەمیشە نەخۆشخانەكانمان لە ئامادەباشی تەواودان و بەڕووی هاوڵاتیاندا كراوە دەبن، بەو هیوایەی كە هاوڵاتیانمان پێویستیان پێی نەبێت ".

 

هەروەها ئاماژەی بەوەش كرد: لە ڕۆژانی عارفەشدا لەناو بازاڕو شوێنە گشتی و جەنجاڵەكاندا تیمی فریاگوزاری تەندروستی ئامادەییان دەبێت، هەر تیمێكیش پێكهاتووە لە دوو كارمەندی تەندروستی و یەك ئەمبولانسی فریاگوزاری.

 

د.میران وتیشی:" لە ڕۆژی یەكەمی جەژندا لە سەرقەبرانەكان و لەهەر سێ ڕۆژەكەشدا لە شوێنە گەشتیارییەكانی ناو شارو دەرەوەی شارو سەر ڕیگای ئەو شوێنانە، تیمی فریاگوزای خێرای تەندروستی و ئەمبولانسەكانمان لە ئامادەباشی تەواودا دەبن لەپێناو پاراستنی تەندروستی هاوڵاتیانی خۆماندا ".

 

بەڕێوبەری گشتی تەندروستی ئەوەشی خستەڕوو:" ئامادەكاریمان كردوە بۆ ئەوەی لە مەرزی نێودەوڵەتی باشماخ لەڕۆژانی جەژندا تیمەكانی خۆپاراستن كارەكانی خۆیان لە خاڵە سنورییەكە بكەن و پشكنین بۆ ئەو خۆراك و پێداویستیانە بكرێت كە دێنە ناوەوە، لەگەڵ چاودێریكردنی ڕێستۆرانت و خواردنگەكانی ناو بازاڕو شوێنە گەشتیاری و گشتییەكاندا لەلایەن لیژنەكانی چاودێری تەندروستییەوە.".

 

 

 

سەلام بێستاسنوری