هەولێر... بڕێكی زۆر دەرمانی ساختەی مەترسیدار دەستیان بەسەرداگیرا

02/07/2019 - 09:15 بڵاوکراوەتەوە لە هەواڵ/كوردستانی

 

قائیمقامیەتی قەزای ناوەندیی هەولێر ڕایدەگەیەنێت: بڕێكی زۆر بەناو دەرمانی ساختە و رێگە پێنەدراولەكۆگایەكی شاراوە دەستیان بەسەرداگیرا


قائیمقامیەتی قەزای ناوەندیی هەولێر لەڕاگەیەندراوێكدا كەوێنەیەكی دەست كوردیو كەوتوە، ڕایگەیاند: لێژنەی باڵای بەدواداچوونی دەرمان كە پێكهاتووە بەسەرۆكایەتی قایمقامیەتی قەزای ناوەندیی هەولێر و بەڕێوەبەرایەتی كۆنترۆڵی جۆری دەرمان، بەڕێوەبەرایەتی نەھێشتنی تاوانی ڕێكخراو سەربە ئاژانسی پاراستن و بەڕێوەبەرایەتی ئاسایشی هەولێر وبە ھاوكاری و بەشی پۆلیسی شارەوانی.


هەروەها ئەوەشی خستەڕوو: كۆگایەكی نهێنیی دەرمانی ساختە و رێگەپێنەدراویان لە هەولێر دەست بەسەر داگرت كە ئەم كۆگایە دەكەوێتە سەر ڕێگای هەولێرـ گوێڕ، بڕی۲٠تۆن دەرمانی ساختە و رێگەپێنەدراو و نەشیاوی تێدابوو.


ئاماژەی بەوەشكرد: بەشێكی زۆری ئەو بەناو دەرمانانه تایبەت بوو به بەهێزكردنی توانای جنسی پیاوان و ئافرەتان بەشێكیش تایبەت بوون بە دابەزاندنی كێش و هەموو دەرمانەكان لەلایەن لێژنەكەوه دەستیان بەسەردا گیرا و خاوەنەكەشی دەست بەسەر كرا و پەڕاوی لێكۆلینەوەی بۆ كراوەیەوە ڕەوانەی بەردەم بەڕێز دادوەری لێكۆلینەوە كرا.