سەبارەت بەدۆسیەكەی سێوە قادر دادگا بریارێكی نوێ دەردەكات

11/07/2019 - 14:54 بڵاوکراوەتەوە لە هەواڵ/كوردستانی

‌ماوەی رابوردوو داگا بڕیاری ئازادكردنی تۆمەتباری دووەمی كەیسی (سێوە قادر)ی دەركرد و كەسوكارەكەشی تەمیزی بڕیاری ئازادكردنەكەیان كرد، بەڵام تەمیزەكە پەسەندنەكرا و دۆسیەكەی داخرا.

سامی ساتی، پارێزەری تۆمەتباری دووەم لە كەیسی سێوە قادر و منداڵەكانی رایگەیاند: بەهۆی نەبوونی هیچ بەڵگەیەك دژی تۆمەتبار (س. م. ا)، دادگای لێكۆڵینەوەی سلێمانی/1 رۆژی 22ی نیسانی ئەمساڵ، بڕیاری ئازادكردن و داخستنی دۆسیەی ناوبرای دەركرد، بەڵام كەسوكاری (سێوە قادر) داوای پێداچوونەوە (تەمیز)ی ئەو بڕیارەیان كرد.

ئەوەشی بۆ دوا رۆژ ئاشكرا كردوە، دادگای تاوانەكانی سلێمانی/1 بەسیفەتی پێداچوونەوە داواكاری سكاڵاكاران بەمافی كەسی رەتكردەوە و بڕیاری ئازادكردنەكەی پەسەندكرد، تۆمەتباری (س. م. أ)یش بێتاوانی سەلمێندرا و كەیسەكەی داخرا".

جێگەی ئاماژەیە، ئێوارەی رۆژی 16ی كانوونی یەكەمی 2018، بەهۆی ئاگرێكی گوماناوی‌ لەماڵێكی گەڕەكی ئاسوودە لەچەمچەماڵ، سێ منداڵ بەناوەكانی (دارین – لارین و دەوەن دیار) كە تەمەنیان لەنێوان 5 ساڵ و 3 ساڵ و 6 مانگدا بوو گیانیان لەدەستدا و دایكیشیان بەناوی (سێوە قادر) دوای هەفتەیەك ‌مانەوەی لە نەخۆشخانە بەهۆی زۆریی و سەختی برینەكەی بەرەبەیانی رۆژی 24ی هەمان مانگ گیانی لەدەستدا و باوكی سێوەش مێردی كچەكەی تۆمەتباركرد بەو رووداوە و وتی: "كچەكەم و هەرسێ منداڵەكەی سوتاندووە‌"، تا ئێستاش لێكۆڵینەوە لە كەیسەكە بەردەوامە.