سەبارەت بە بڕینی موچەی ئەم توێژە رونكردنەوە دەدرێت

13/07/2019 - 16:28 بڵاوکراوەتەوە لە هەواڵ/كوردستانی
دەربارەی برینی موچەی زیندانیانی سیاسییەوە روونكردنەوە دەدرێت و بەڕێوەبەری كاروباری زیندانییە سیاسییەكان لەوەزارەتی كاروباری شەهیدان و ئەنفالكراوانیش ئاشكرای دەكات ، تاوەكو هەشت مانگی دیكە موچەكانیان بەردەوام دەبێت و نابڕێت.
ئەحمەد مام رەسوڵ بەڕێوەبەری كاروباری زیندانییە سیاسییەكان لەوەزارەتی كاروباری شەهیدان و ئەنفالكراوان رایگەیاند: بەپێی یاسا مینحەی زیندانی سیاسی بۆماوەی (10 ) ساڵ دەدرێت، ئەگەر موچەیەكی دیكەیان هەبێت، بەڵام بۆئەوانەی هیچ موچەیەكی دیكەیان نییە، تا لەژیاندا بن ئەو مینحەیەیان پێدەدرێت.
ئەوەشی ئاشكرا كردوە ، لە رۆژی 31/6/2019 ماوەی (10) ساڵەكە تەواو بوە، بەڵام چەند مانگێك لەمەوبەر بەمەبەستی چارەسەركردنی ئەو كێشەیە پڕۆژەیەكمان ئاڕاستەی ئەنجومەنی وەزیران كردووەو تێدا داوامان كردووە هاوشێوەی حكومەتی فیدراڵ ماوەی پێدانی مینحەی زیندانیانی سیاسی لە( 10) ساڵەوە بۆ (25) ساڵ زیاد بكرێت".

بەرێوبەری كاروباری زیندانیە سیاسیەكان ئەوەشی بۆتۆری هەواڵی سلێمانی ئاشكرا كردوە، هەر لەو پڕۆژەیەدا داوامان كردووە، هاوشێوەی بەغدا مینحەی زیندانیانیی سیاسی بكرێت بە ملیۆنێك و (200) هەزار دینار، چونكە زیندانی سیاسی ئەوە قبوڵ ناكات كەمتر لەو مافەی پێبدرێت كە لەحكومەتی ناوەندی بۆی دەستبەركراوە، وە ئەم مانگە زیندانیانی سیاسی موچەی مانگی (11) ساڵی ( 2018) وەردەگرن، هەشت مانگیان ماوە تاوەكو مینحەكە دەبڕێت، بۆیە مینحەی مانگانەكەیان تا هەشت مانگی دیكە بەردەوام دەبێت و نابڕدرێت.