داوای خەرجكردنی 18موچە بۆئەم موچە خۆرانە دەكرێت

14/07/2019 - 16:33 بڵاوکراوەتەوە لە هەواڵ/كوردستانی
كۆمەڵەی پێشمەرگە كەمئەندامبوەكانی سەنگەر داوای جێبەجێكردنی چوار خاڵ لەیاسای ژمارە (34) لەحكومەتی هەرێم دەكەن، جێگری سكرتێری كۆمەڵەكەش ئاشكرای دەكات، بەگوێرەی ئەو یاسایە دەبێت (18) موچە بەسەریەكەوە بۆ پێشمەرگە كەمئەندامبوەكانی سەنگەر خەرجبكرێت.
شێركۆ نوری جێگری سكرتێری كۆمەڵەی پێشمەرگە كەمئەندامبوەكانی سەنگەر ڕایگەیاند: یاسای ژمارە (34)ی ساڵی (2007) كە لەپەرلەمانی كوردستان پەسەندكراوەو تایبەتە بەكەمئەندامانی سەنگەر، كۆمەڵێك ماف و ئیمتیازاتی بۆ كەمئەندامانی سەنگەر دیاریكردوە كە تائێستا چەند خاڵێكی گرنگی جێبەجێنەكراوە.
ئەوەشی ئاشكرا كردوە، بەگوێرەی ئەو یاسایە، دەبێت موچەی (18 )مانگی كەمئەندامانی سەنگەر بەیەكەوە بدرێت و زۆربەشمان مامەڵەی وەرگرتنی ئەو پارەیەمان تەواوكردوە، بەڵام وەزارەتی دارایی ئامادەنییە خەرجی بكات.

شێركۆ نوری ئەوەشی بۆتۆری هەواڵی سلێمانی ئاشكرا كردوە، كەسانێك هەن تازە بون بەكەئەندامی سەنگەرو ڕێژەی كەمئەندامیەكەیان وەكو ئێمە نییە، بەڵام ئەو (18) موچەیەی بۆ خەرجكراوە.

شێركۆ نوری ڕونیدەكاتەوە، "بەگوێرەی ئەو یاسایە هەر كەمئەندامێكی سەنگەر خۆی یان خێزانەكەی ویستی خوێندنیان هەبێت، ئەوە دەبێت تیچوی خوێندنیان بۆ دابین بكرێت، هاوشێوەی كەسوكاری شەهیدان و ئەنفالكراوان، بەڵام بۆ ئێمە نەكراوە".