هەڤال ئەبوبەكر وەڵامی پەرلەمانتارێكی حزبەكەی دەداتەوە

15/07/2019 - 14:25 بڵاوکراوەتەوە لە هەواڵ/كوردستانی

دوای ئەوەی پەرلەمانتارێكی بزوتنەوەی گۆران ئاشكرای كردبوو بەغدا سوتەمەنی بۆهاوڵاتیانی هەرێم ناردووە ، بەڵام دابەش نەكراوە ، پارێزگاری سلێمانی وەڵامی پەرلەمانتاری حزبەكەی دەداتەوەو ئاشكرای دەكات، هیچ بڕە نەوت یان بەنزینێك بەهەدەر نەدراوە، و لەداهاتووشدا هەر بڕە نەوت یان بەنزینێك لەسلێمانی ببڕدرێت، ئەوا پەرلەمانتاری گۆڕان غالب محەمەد لێی بەرپرسە.

هەڤاڵ ئەبووبەكر پارێزگاری سلێمانی لەپەراوێزی مەڕاسیمێكی ژینگەییدا لە لێدوانێكی رۆژنامەوانیدا ڕایگەیاند: هیچ نەوتێك بۆ ئاوارەكان نەهاتووە، بەڵكو لەزستاندا لەسەر بودجەی پارێزگای سلێمانی نەوتیان بۆ ئاوارەكان و زیانلێكەوتوانی دۆڵی شاورێ و باڵەكایەتی و بناری قەندیل كڕیوە، وە نەوت و بەنزینیش لەسەر بودجەی پارێزگای سلێمانی بۆ ئەو فەرمانگانە كڕدراوە، كە پارە بۆ ئاوارەكان خەرج دەكەن، وە یەك لیتر بە هەدەر نەدراوە، هەر كەسێكیش داتا و زانیاری دەوێت پێی دەدەن.

پارێزگاری سلێمانی ئەوەشی ئاشكرا كردوە، چاوەڕێی پاڵپشتییان دەكرد بۆئەوەی نەوت و بەنزینیان بەدەست بگات، نەك ئەوەی ئێستا بەم جۆرە باسی لێ بكەن، وە لەداهاتوشدا هەر بڕە نەوت یان بەنزینێك لەسلێمانی ببڕدرێت، ئەوا ئەو پەرلەمانتارە لێی بەرپرسیارە، واتە نەئێمە و نە بەرهەمە نەوتییەكان و نە پەرلەمانتارەكانی تر لێی بەرپرسیار نین، و ئەمە ڕای خۆی و تایبەتی بووە و هیچ كەسێك لەگەڵی نەبووە، بۆیە وەك هاوڵاتییەك سەیری دەكەین، ئەو پەرلەمانتارە تاكو ئێستا نەهاتووەتە پارێزگا و داوای داتاو زانیاری بكات.

جێگەی ئاماژەیە، ئەو قسانەی پارێزگاری سلێمانی لەوەڵامی لێدوانی غالب محەمەد پەڕلەمانتاری گۆڕان لە پەڕلەمانی عیراقدا هات كە ڕایگەیاند بەغدا سوتەمەنی بۆ پارێزگاكانی هەرێم ناردووە و نەدراوە بە هاووڵاتیان بۆ بەرپرسان و حكومەت خەرجكراوە و پارێزگارەكانیشی بە كەمتەرخەم و گەندەڵ لەوەدا ناوبرد كە چاودێری پرۆسەكە ناكەن.