عەریزە نوسەكانی سلێمانی مانگرتنیان ڕاگەیاند

23/07/2019 - 11:00 بڵاوکراوەتەوە لە هەواڵ/كوردستانی

 

ئەمڕۆ سێ شەممە ژمارەیەك لە عەریزە نوسەكانی سلێمانی گردبونەوەو تیایدا ڕایانگەیاند: كۆمپانیایەك دەیەوێت عەریزەنوسی بە سیستەمێكی نوێ پێشكەش بكات و بڕی 25 هەزار دینار لەهاوڵاتیان وەردەگرێت.


سەرلەبەیانی ئەمڕۆ سێ شەممە 23-7-2019 ژمارەیەك لە عەریزەنوسەكان لە دادنوسی یەك و لەبەكرەجۆر و سەهۆڵەكە لە شاری سلێمانی بایكۆتی كارەكانیان كرد، ئەویش بەهۆی ئەوەی كۆمپانیایەك بە نیازە كاری عەریزەنوسی بە سیستەمێكی نوێ پێشكەش بكات، لە هەمان كاتدا نرخەكەی لە 2500 دینارەوە بكاتە 25 هەزار دینار ، ئەمەش نیگەرانییەكی زۆری عەریزەنوسەكانی لێكەوتووەتەوە .


پەیامنێرمان لەشاری سلێمانی پێی ڕاگەیاندین: سیستەمی بە ئەلیكترۆنی كردنی عەریزەنوسین بە پلەی یەكەم زیانی بۆ هاوڵاتیان هەیە پاشان بۆ عەیزەنوسەكان و سودمەندی یەكەم لەم كارە تەنها كۆمپانیاكەیە .


هەروەها ووتیشی: لەئێستادا عەریزەنوسەكان نیگەرانن و دەڵێن ئێمە ئامادەنین بچینە ژێر ركێفی كۆمپانیایەك كە تەنها بەرژەوەندی خۆی دەوێت و بە ماوەیەكی زۆر خێرا لەسەر گیرفانی هاوڵاتیان سەرماییەكی زۆر كۆدەكاتەوە .


ئەوەشیان خستەڕوو: ئەگەر ئەم كۆمپانیایە دەستبەكاربێت ژمارەیەكی زۆر عەریزەنوس بێ كار دەبن، چونكە كۆمپانیاكە سیستەمی خۆی پەیڕەو دەكات و بە موچەیەكی زۆر كەم كەسانی تر لەم شوێنە دەخاتە كارە .