سلێمانی... بەهۆی گەڕان بەدوای تەرمێكدا، چەند گەڕەكێك بێ ئاودەبن

29/07/2019 - 11:03 بڵاوکراوەتەوە لە هەواڵ/كوردستانی

وتەبێژی بەڕێوەبەرایەتی ئاوی سلێمانی ڕایدەگەیەنێت: بەهۆی گەڕان بەدوای تەرمی گەنجێك لە زێی بچوك، دابەشكردنی ئاو لە كاتژمێر چواری بەیانی ئەمڕۆ لە هەردوو پڕۆژەی یەك و دووی ئاوی دوكان سلێمانی وەستاوە.

 

ئامانج جەلال وتەبێژی بەڕێوەبەرایەتی ئاوی سلێمانی ڕاگەیاند: بەهۆی خنكانی گەنجێك لە زێی دوكان و بۆ دۆزینەوەی تەرمەكەی، ئاوی بەنداوەكە گیراوەتەوە و بەوهۆیەشەوە، دابەشكردنی ئاو لە كاتژمێر چواری بەیانی ئەمڕۆ دووشەممە 29-7-2019، لە هەردوو پڕۆژەی یەك و دووی ئاوی دوكان سلێمانی وەستاوە.

 

هەروەها ووتیشی: بەو هۆیەوە بەشێكی زۆری گەڕەكەكانی شاری سلێمانی و قەزاو ناحیەكانی چەمچەمەڵ وشۆڕش و تەكێ و بازیان و پیرەمەگروون بێ ئاو دەبن و نازانین دابەشكردنی ئاو بەسەر ئەو گەڕەكانەدا كەی دەستپێدەكاتەوە.


جێگەی ئاماژەبۆكردنە لە ڕۆژی 26-7-2019 گەنجێكی تەمەن 17 ساڵ لە زێی دوكان خنكا و تا ئێستا لەلایەن تیمەكانی مەلەوانیەوە گەڕان بەدوای تەرمەكەیدا بەردەوامە.