وەزیری پێشمەرگە :چەکدارانی داعش دەرفەتێکی زێڕینیان بۆ دروست بووە بۆ ئەوەی خۆیان رێکبخەنەوە

11/08/2019 - 19:50 بڵاوکراوەتەوە لە هەواڵ/كوردستانی


وەزیری پێشمەرگە رایده‌گه‌یه‌نێت، چەکدارانی داعش دەرفەتێکی زێڕینیان بۆ دروست بووە بۆ ئەوەی خۆیان رێکبخەنەوە، "دڵنیاشم ئەو هەنگاوەیان دەستپێکردووە"، هاوكات له‌باره‌ی هێزێکی یەکگرتووی پێشمەرگەش رونكردنه‌وه‌ ده‌دات.

ئەمڕۆ یەکشەممە، 11-8-2019 شۆڕش ئیسماعیل، وەزیری پێشمەرگە بەبۆنەی جەژنی قوربان، هێزەکانی پێشمەرگەی لە کوڵەجۆ بەسەرکردە، کە چەند رۆژێک لەمەوبەر بەهۆی هێرشێکی چەکدارانی داعش لەو شارۆچکەیە، چوار کارمەندی هێزە ئەمنییەکان شەهید بوون.

وەزیری پێشمەرگە لە کۆنگرەیەکی رۆژنامەڤانیدا هه‌واڵی سەرهەڵدانەوەی داعش لە عێراقی پشتڕاستکردەوە، کە مەترسی هاوشێوە هەیە، شۆڕش ئیسماعیل جه‌ختیكرده‌وه‌، "بێگومان لەو بۆشاییە ئەمنییەی دروست بووە، دەرفەتێکی زێڕین بۆ تیرۆرستانی داعش دروست بووە، کە بتوانن خۆیان رێکبخەنەوە، دڵنیاشم ئەو هەنگاوەیان دەستپێکردووە و خۆشیان کۆکردووەتەوە، ئەگەر چارەسەر نەکرێت، رەنگە بتوانن لە ئاییندەدا کاری خراپتر و قێزەونتر بکەن".

ناوبراو لەبارەی هێزێکی یەکگرتووی پێشمەرگەشەوە دووپاتیكرده‌وه‌، "خەونی من و هەموو نیشتمانپەروەرانی ئەو میللـەتەیە، کە لە ئاییندەدا کورد هێزێکی نیشتمانی هەبێت و شانازی پێوە بکات، هێزەکە ببێتە ئاییندەی نەوەکانمان، لەبەرئەوە هەوڵی بۆ دەدەین، هێزەکە هەروەها پشتیوانییەکی زۆری هەیە، بەڵام هێشتا لە سەرەتای رێگەکەداین".