سلێمانى... هاوڵاتیان لەڕێگەى ڕێکخراوەکانى ڕابیتەو بەختەوەرى قوربانى ئەنجام دەدەن

12/08/2019 - 14:45 بڵاوکراوەتەوە لە هەواڵ/كوردستانی

 

ئةمڕۆ دوو شەممە هاوڵاتیانى شارى سلێمانى سوننەتى قوربانیان ئەنجامداو لەڕێگەى ڕێکخراوە خێرخوازیەکانى یەکگرتووى ئیسلامیەوە بەسەر هەژاراندا دابەشکران.

 

سەرلەبەیانى ئەمڕۆ دوو شەممە هاوڵاتیانى شارى سلێمانى سوننەتى قوربانیان ئەنجامداو لەڕێگەى ڕێکخراوەکانى ڕابیتەى ئیسلامى کوردستان و ڕێکخراوى بەختەوەرى یەوە بەشێوەیەکى گونجاوو تەندروست سەربڕدران و دابەشدەکرێن بەسەر هەژاراندا.

 

جەمال محمود, بەرپرسى لقى سلێمانى ڕابیتەى ئیسلامى بە کوردیوى ڕاگەیاند: بەراورد بە ساڵانى ڕابردوو ئەمساڵ ڕێژەى قوربانى زۆر زیاترەو تا ئێستا ٦٠٠ سەر حەیوان بەشێوەیەکى تەندروست و لەژێر چاودێرى پزیشکى ڤێترنەرى سەربڕدراوەو لە ئێستادا خەریکى ئامادەکردنیانین بۆ دابەشکردن و لە سێهەم ڕؤژى جەژنەوە خەریکى دابەشکردنیان دەبین.

 

لاى خۆشیەوە هێمن حەمە ئەمین، بەرپرسى پڕۆسەى قوربانى لە ڕێکخراوى بەختەوەرى بە کوردیوى ڕاگەیاند: تا ئێستا نزیکەى دوو تەن گۆشتمان حازر کردووە بۆ قوربانى پرۆسەکە هەتا چوارەم ڕۆژى جەژن بەردەوام دەبێت بەشێوەیەکى شەرعى و تەندروستى ئامادەکراون و دابەشیان دەکەین بەسەر هەژاران و کەسى نەخۆش و خاوەن پێداویستى تایبەت.

 

جێگەى ئاماژەیە لە چەند ساڵى ڕابردودا بەهۆى قەیرانى دارایى ڕێژەى قوربانیکردن لاى هاوڵاتیان کەمیکردبوو بەڵام لەمساڵدا داوى باشتربونى گوزەرانى هاوڵاتیان ڕێژەیەکى بەرچاو لە خەڵکى ئەو سوننەتەیان زیندوو کردەوە.