بەتۆمەتی ڕفاندنی كچێك سێ كەس دەستگیركران

24/08/2019 - 17:45 بڵاوکراوەتەوە لە هەواڵ/كوردستانی

لەشاری سلێمانی، 3 كەس بە تۆمەتی رفاندنی كچێك دەستگیر دەكرێن و پۆلیسی شارەكەش كچە رفێندراوەكە ئازاد دەكات.

بەگوێرەی راگەیاندراوێكی بەڕێوەبەرایەتی پۆلیسی پارێزگاری سلێمانی، كە وێنەیەكی دەست كوردیو كەوتووە، مەفرەزەكانی بنكەی پۆلیسی ئازادی لەسەر سكاڵای هاوڵاتییەك، سێ كەسیان بە تۆمەتی رفاندنی كچێك دەستگیركرد.

لە راگەیاندراوەكەدا هاتووە، پاش تۆماركردنی سكاڵای یاسایی لەلایەن هاوڵاتییەكەوە كە كچەكەی ڕفێنراوە، هێزەكانی پۆلیس لێكۆڵینەوەكانیان دەستپێكردو زانیاریی پێویستیان لەسەر تۆمەتباران كۆكردەوە، لەماوەیەكی كەمدا توانرا دوو تۆمەتبار بەناوەكانی (د، ك، م) و (م، غ، م) دەستگیربكرێن، دواتر توانرا تۆمەتباری سەرەكی بەناوی (ن، ك، ق) دەستگیر بكرێت، كە لەكاتی دەستگیركردنیدا كچەكەشی لەگەڵدا بووە.

پۆلیسی سلێمانی ئاماژەی بەوەشكردووە، لەئێستادا هەرسێ تۆمەتبار بەبڕیاری دادوەرو بەپێی ماددەی ٤٢١ ڕاگیراون و لێكۆڵینەوەكان بەردەوامن.