بەدواداچوون بۆ دیارنەمانی 20ملیار دیناری پرۆژەكانی سلێمانی دەكرێت

08/09/2019 - 09:10 بڵاوکراوەتەوە لە هەواڵ/كوردستانی


جێگری سەرۆكی لیژنەی دەستپاكیی پەرلەمانی كوردستان رایدەگەیەنێت: لە كاتی بوونی سلێمانی بە پایتەختی ڕۆشنبیری، ئەنجومەنی وەزیران 20ملیار دیناری بۆ خەرج كردووە، بەڵام لە كۆی ئەو پارەیە تەنیا 450ملیۆنی دیارە و ئەوەی دیكەی هەمووی بەهەدر دراوە و هیچ پڕۆژەی پێ جێبەجێ نەكراوە.


سەعید هەركی جێگری سەرۆكی لیژنەی دەستپاكیی پەرلەمانی كوردستان ڕایگەیاند:" نووسراوێكمان ئاراستەی سەرۆكایەتیی پەرلەمان كردووە بۆ ئەوەی داوا لە ئەنجومەنی وەزیران بكات دەربارەی تەرخانكردنی 20ملیار دینار بۆ بوونی سلێمانی به ‌پایتەختی ڕۆشنبیری زانیاریی تەواومان پێ بدات، چونكە پارەكە هەمووی بەهەدەر دراوە و هیچی بۆ سلێمانی تەرخان نەكراوە."


سەعید هەركی كە بە میدیای پارتی ڕاگەیاند، ووتیشی:" لەو20ملیار دینارە تەنها 450ملیۆن دیناری دیارە و ئەوەی دیكەی هەمووی بەهەدەر دراوە و دیار نییە بۆ چی و لە چی خەرج كراوە، چونكە ئەو پارەیە تەرخان كراوە بۆ ئەوەی پڕۆژەی ڕۆشنبیریی پێ جێبەجێ بكرێت، بەڵام پڕۆژەكان دیار نین."


ئاماژەی بەوەشكرد:" لە چەند ڕۆژی داهاتوودا وەكو لیژنەی خۆمان دەست بە بەدواداچوون دەكەین بۆ ئەوەی بزانین ئەو پارەیە چی لێ هاتووە و چۆن خەرج كراوە."