بۆرێگریكردن لەم دیاردەیە،وەزارەتی پەروەردە بەڵێننامە بە مامۆستایان پڕدەكاتەوە

12/09/2019 - 16:20 بڵاوکراوەتەوە لە هەواڵ/كوردستانی

 

بەڕێوەبەری پەیوەندییە گشتییەكان لە وەزارەتی پەروەردەی عیراق ڕایدەگەیەنێت بەڕێوەبەرایەتییە گشتییەكانیان راسپاردووە بۆئەوەی لەڕێی پركردنەوەی بەڵێننامە بە مامۆستایان بەدواداچوون بكەن بۆ رێگرتن لە وتنەوەی وانەی تایبەتی.

فیراس محەمەد حەسەن بەڕێوەبەری پەیوەندییە گشتییەكان و راگەیاندن لە وەزارەتی پەروەردەی عیراق لە راگەیەندراوێكدا ئاماژەی بەوەدا " بەڕێوەبەرایەتی گشتی سەرپەرشتیاری پەروەردەیی لە وەزارەت، بەڕێوەبەرایەتییە گشتییەكانی بەغدا و سەرجەم پارێزگاكانی راسپاردووە كە هانی سەرپەرشتیارەكان بدەن بەدواداچوون بۆ بەڕێوەبەرێتی قوتابخانەكان بكەن و جەختیان لێبكەنەوە كە بەڵێننامە لە مامۆستایان وەربگرن كە وانەی تایبەتی نەڵێنەوە."
بەڕێوەبەری پەیوەندییە گشتییەكان و راگەیاندنی وەزارەتی پەروەردە ئاماژەی بەوەشداوە" پێویستە مامۆستایان هەوڵی تەواوی خۆیان بدەن بۆ ئەوەی بابەتەكان بگەیەننە قوتابیان و خوێندكاران و هەر مامۆستایەك بەپێی پسپۆڕی خۆی هۆكاری فێركردنی پێویست بەكاربهێنێت وئەم رێوشوێنەیان لە چوارچێوەی ئامادەكارییەكانی وەزارەتە بۆ ساڵی نوێی خوێندنی 2019-2020.

فیراس محەمەد حەسەن ،راشیگەیاندوە" دیاردەی وانەوتنەوەی تایبەت لە دیاردە خراپەكانە كە لە ماوەكانی دواییدا بەشێوەیەكی بەرچاو دەركەوتووە."

پێشتر وەزارەتی پەروەردەی عیراق رایگەیاندبوو كە مامۆستایان و دەستەی قوتابخانەكان لەمڕۆ پێنجشەممە 12ی ئەیلولەوە دەستیان بەكار كردووەتەوە.