سلێمانی...نرخ بۆ پاسەكانی گواستنەوەی قوتابیان دیاری كرا

08/10/2019 - 11:36 بڵاوکراوەتەوە لە هەواڵ/كوردستانی



ئەو پاس و تەكسییانەی قوتابیان دەگوازنەوە دەبێت تەواوی رێنماییەكانی هاتوچۆ و مەرجی سەلامەتی و لایەنی پەروەردەیی جێبەجێ بكەن، بەپێچەوانەوە سزای مادی هەتا لێسەندنەوەی مۆڵەتی كاركردن دەدرێن.

 

لیژنەی سەرپەرشتی گواستنەوەی منداڵانی باخچە و قوتابیان لە ماڵەوە بۆ خوێندنگا و بە پێچەوانەوە كە سەر بە لیژنە هاوبەشەكانی قائیمقامیەتی سلێمانییە، بەبەردەوامی و رۆژانە لە چەند كاتێكی جیاوازدا چاودێری ئەو پاس و تەكسییانە دەكات كە هاتوچۆ بە خوێندكاران دەكەن و رێگە نادات لە رووی نرخ و چۆنێتی گواستنەوەوە بەدەر لە رێنماییەكان كار بكەن.

 

رائید چالاك سەڵاح- نوێنەری هاتوچۆ و سەرۆكی لیژنەكە رایگەیاند: بەپێی كۆنوسێك كەبەبەشداری لایەنە پەیوەندیدارەكان لە قائیمقامیەتی سلێمانی واژوو كراوە رێنمایی بۆ تەواوی ئەو ئۆتۆمبێلانە دەرچووە كە هاتوچۆ بە قوتابیان لە خوێندنگە و باخچەكانی ساوایان و بە حكومی و ناحكومییەوە دەكەن.

 

وتیشی: رێگە نادرێت هیچ ئۆتۆمبێلێك له ژمارەی كوشنەكان زیاتر قوتابی هەڵبگرێت و نرخی گواستنەوەكانیش دیاریكراوە، ئەمە سەرەڕای ئەوەی پێویستە ئۆتۆمبێلەكە مەرجی توندوتۆڵی تێدا بێت و لە روی یاساییەوە هیچ كێشەیەكی نەبێت.


ئاماژەی بەوەش كرد بەپێی كۆنوسەكە پێویستە لە هەر خوێندگەیەكدا لیژنەی تایبەت بە سەرپەرشتی پاسەكان هەبێت و بەڵێننامە و تەواوی بەڵگەنامەی شۆفێر و پاسەكانی لابێت و ئیدارەی خوێندنگەكە چاودێری ئەو ئۆتۆمبێلانە بكات.

 

رائید چالاك وتیشی: هەر شۆفێرێك پابەندی ئەو رێنماییانە نەبێت بە سەرپێچی هاتوچۆ بۆی هەژمار دەكرێت و راستەوخۆ بەپێی یاسا سزای مادی دەدرێت.

 

لە بارەی نرخی گواستنەوەشەوە ئەوەی ئاشكرا كرد كە:


1/ ئەو خوێندنگا و باخچانەی لە سنوری گەڕەكەكانی خۆیان نرخی گواستنەوەیان بە پاس لە (15 – 20) هەزار و بۆ تەكسی لە (25 – 30) هەزار دینار دەبێت بۆ هەر مانگێك.


2/ ئەو خوێندنگا و باخچانەی كە دەكەونە دەرەوەی سنوری گەڕەكەكانی خۆیان، بەڵام لەناو شەقامی بازنەیی مەلیك مەحموددان بۆ پاس (20 – 30) هەزار و بۆ تەكسی (25 – 35)هەزار دیناردا دەبن بۆ هەر مانگێك و بەپێی دورونزیكی نرخەكان كەم و زیاد دەكات.

 

لیژنەی سەرپەرشتی گواستنەوەی منداڵانی باخچە و قوتابیان لە ماڵەوە بۆ خوێندنگا و بە پێچەوانەوە كە سەر بە لیژنە هاوبەشەكانی قائیمقامیەتی سلێمانییە لە نوێنەری هاتوچۆ و ئاسایش و گواستنەوە و پەروەردە و چاودێری بازرگانی پێكهاتووە و بۆ گلەیی و رەخنە لە هەر پاسێك یان ئیدارەی خوێندنگەیەك كە تێبینی ئەوە كرابوو بەدەر لە رێنماییەكان كار دەكات، دەتوانرێت لە رێگەی پەیجی قائیمقامیەتی سلێمانی یان ژمارە موبایلی لیژنە هاوبەشەكانەوە (07708677777) سكاڵا بكرێت.