گۆڕان: یەكێتی ڕێزی لە ئیمزای جەلال تاڵەبانی نەگرت

20/02/2019 - 16:10 بڵاوکراوەتەوە لە هەواڵ/كوردستانی


پەرلەمانتارێكی بزوتنەوەی گۆڕان ڕەخنەی توند لە یەكێتی نیشتیمانی كوردستان دەگرێت كە بێ وەفابووە بەرامبەر بە ڕێكەوتنەكان و تەنانەت ڕێزیشی لە ئیمزای مام جەلال نەگرتووە كە لە دەباشان لەگەڵ نەوشیروان مستەفادا كردیان.


گۆران ئەحمەد لە وتارێكدا بە ناوی ئەخلاق و سیاسەت نوسیویەتی دەڵێت" لە دەستپێكی نزیكبونەوەمان لەگەڵ یەكێتی بۆ پێكهێنانی كابینەی حكومەتی پێشوی هەرێم ، مەلا بەختیار ڕیسەكەی لێ كردونەتەوە بە خوری و هەواڵەكەی بە پارتی ڕاگەیاندووە".


پەرلەمانتارەكەی دەڵێت" ڕێك كەوتنی دەباشان لەلایەن ڕەوانشاد نەوشیروان مستەفا لەگەڵ سكرتێری گشتی یەكێتی نیشتیمانی كوردستان مام جلال تاڵەبانی كرا .ئەوان ڕێزیان لە ئیمزاكەی جلال تاڵەبانی نەگرت و هیچ خاڵێكی ڕێكەوتن نامەكەیان جێ بەجێ نەكرد" .


سەبارەت بە ڕەخنەكانی میدیای یەكێتی لە بزوتنەوەی گۆڕان، گۆران ئەحمەد دەڵێت ئەو كەسانەی كەقسە دەكەن بڕۆن سەیری ڕێكەوتنی یەكێتی بكەن كە هەفتەی پێشوو ئیمزایان كرد ، داوای شەریكایەتی لەنەوت و پڕۆژەكان و داوای شەریكایەتی لەپۆستەكانی هەرێم وبەغداد، داوای بەحیزبی كردنی حوكمەت دەكەن".

لە چەند ڕۆژی ڕابردوودا، دوای چەند ساڵێك لە دژیەتی سەرەسختی یەكتری، بزوتنەوەی گۆڕأن ڕێكەوتنێكی چوار ساڵی لەگەڵ پارتیدا ئیمزاكرد بۆ بەشداریكردن لە حكومەتدا و بە وەرگرتنی ژمارەیەك پۆست پەیوەندیەكانیان لەگەڵ ئەو حیزبەدا ئاسایی بوەوە.