خوێندنی باڵا: هەرێم دەچێتە سەر نەخشەی جیهانی (EDUCATION FIRST)

21/05/2019 - 15:27 بڵاوکراوەتەوە لە هەواڵ/كوردستانی


بۆ یەكەم جار لە مێژوی زانكۆكانی هەرێمی كوردستان پرۆسەی هەڵسەنگاندنی توانستی زمانی ئینگلیزی وەك زمانی دوەم لە ژماریەك لە زانكۆكانی هەرێمی كوردستان ئەنجامدراو بەم تاقیكردنەوەیە هەرێمی كوردستان دەچێتە سەر نەخشەی جیهانی (Education First) بۆ هەڵسەنگاندنی توانستی زمانی ئینگلیزی.

 

د. یوسف گۆران وەزیری خوێندنی باڵا و توێژینەوەی زانستی لە ڕاگەیەندراوێكدا كەوێنەیەكی دەست كوردیو كەوتوە، ڕایگەیاند: لە ئەمڕۆ بە دواوە هەرێمی كوردستان دەچێتە سەر نەخشەی هەڵسەنگاندنی توانستی زمانی ئینگلیزی لەسەر ئاستی نێودەوڵەتی، ئەمەش لە ڕێگەی بەشداریكردنی مامۆستایان و خوێندكاران و قوتابیانی زانكۆكانی كوردستانە لەو تاقیكردنەوە ستانداردە، بەو پێیەی زمانی ئینگلیزی زمانی زانست و بزنس زمانی گەیشتنە بە سەرچاوە زانستییە ئاستبەرزەكان. و زمانی پەیوەندی و هەماهەنگیە لەگەڵ كۆمەڵگەی ئەكادیمی نێودەوڵەتی، هەروەك زمانی بڵاوكردنەوەی بەرهەمی توێژینەوەی زانستیە.

 

هەروەها د.یوسف گۆران داواشی لە هەموو مامۆستایان و قوتابیان و خوێندكارانی زانكۆكان كرد كە بەشدار بن لەم تاقیكردنەوە، بۆ ئەوەش وتی: بەشداریكردن لەم پرۆسەیە وەك تاقیكردنەوە سەیر نەكەین، دەرچون و دەرنەجوون لەم تاقیكردنەوەیەدا نیە بەڵكو ئەم پرۆسەیە هاوكارمان دەبێت بۆ ئەوەی باشتر لە كێشەو كەموكورتییەكانی پرۆسەی خوێندن و فێركردنی زمانی ئینگلیزی تێبگەین و هاوكارمان دەبێت بۆ دانانی ستراتیجی نیشتیمانی بۆ مەبەستی پەرەپێدانی توانستی زمانی ئینگلیزی و چەسپاندنی وەك زمانی دووەم لە نێو دامودەزگاكانی خوێندنی باڵا.

 

لەو چوارچێوەیەداو سەبارەت بە چۆنیەتی بەڕێوەچونی پرۆسەی تاقیكردنەوەكان لە زانكۆكانی هەرێمی كوردستان، بەچاودێری (د. یوسف گۆران) وەزیری خوێندنی باڵا و توێژینەوەی زانستی و بەسەرپەرشتی (د. ئامانج عەبدوڵا سەعید) ڕاوێژكاری وەزیری خوێندنی باڵا، هەریەك لە (د. كاوە شێروانی) سەرۆكی زانكۆی پۆلیتەكنیكی هەولێر و (م. فوئاد عەلی سمایل) جێگری بەڕێوەبەری گشتی توێژینەوەو پەرەپێدان، سەردانی هۆڵی تاقیكردنەوەكانی زانكۆی پۆلیتەكینكی هەولێریان كردو لەنزیكەوە لە چۆنیەتی بەرێوەچونی تاقیكردنەوەكانیان كۆڵیەوە، بەو پێیەی كە دامەزراوەی (Education first) هەڵسەنگاندن بۆ نزیكەی (٨٠) وڵات كە زمانی ئینگلیزی وەك زمانی دوەمیانە دەكەن.

 

هەروەها م. فوئاد عەلی باسێكی لەبارەی بەڕێوەچونی تاقیكردنەوەكە كردو ڕایگەیاند: پرۆسەكە بەشێوەیەكی ئۆنلاین بۆ ماوەی دوو هەفتە بەردەوام دەبێت و لەئێستادا بەشێكی زۆر لە زانكۆكانی كوردستان بەردەوامی هەیە.

 

وتیشی: دوای هەڵسەنگاندنەكە خودی سێنتەرەكانی زمان هەڵسەنگاندن لەسەر كاریگەری زمانی ئینگلیزی لەسەرجەم سێكتەرەكانی تەندروستی، كۆمەلایەتی، ئابوری، ئاستی رۆشنبیری دەكەن. تاقیكردنەوەكانیش دەرچون و كەوتنی تیادانیەو ماوەی نزیكەی یەك سەعات دەخایەنێت.

 

لەبارەی ئامادەكاری زانكۆكان بۆ ئەم تاقیكردنەوەیە، دوپاتیكردەوە لە ئێستادا لە بەشێكی زۆری زانكۆكانی كوردستان سێنتەرو پێداویستیەكانی كۆمپیوتەر و ئینتەرنێتیان دابینكردوەو رۆژانە مامۆستایان و خوێندكاران و قوتابیان بەشێوەیەكی بەرچاو بەشداری لە تاقیكردنەوەكان دەكەن.

 

جێگەی ئاماژەیە دامەزراوەی (Education First) یەكێكە لە دامەزراوە زانستییە نێودەوڵەتییەكان و سەرپەرشتی ئەم تاقیكردنەوەیە دەكات، لە ماوەی ٥٠ ساڵی ئەزمونی كاركردنیاندا گرنگی بە فێربوون و ڕاهێنانی زمانی ئینگلیزی دەدەن و خاوەنی ڕاپۆرتی بەناوبانگن، (English Proficiency Index) ساڵانە لە ڕێگەی تاقیكردنەوەیەكی ستانداردی زمانی ئینگلیزییەوە ئاستی توانستی زمانی ئینگلیزی زیاتر لە (٨٠) وڵاتی دونیا هەڵدەسەنگێنن و دواتر داتاكانی توانستی زمانی ئینگلیزی دەبەستنەوە بە ئاماژەكانی گەشەكردنی ئابووری و گەشەپێدانی مرۆیی و توێژینەوە و پەرەپێدانەوە.

 

 

س ب