د کەرنەڤالێ یوبیلا زێرین یا پارێزگەهبوونا دهوکێ دا وێنێن باژێری یێن کەڤن دێ هێنە نیشاندان

12/06/2019 - 15:02 بڵاوکراوەتەوە لە هەواڵ/كوردستانی

 

کوردیو دهوک 

بهەلکەفتا یوبیلا زێرین یا پارێزگەهبوونا دهوکێ دێ کەرنەڤالەکێ جەماوەری هێتە گێران ژ لایێ رێڤەبەریا گشتی یا رەوشەنبیری وهونەری ل دهوکێ وسەروکایەتیا باژێرڤانیا دهوکێ ل پارکا نەوروز.

ل دەستپێکێ ل دەمژمێر شەشی ئێڤاری رێپیڤانا کوردوسێن جەماوەری وترومبێلێ خەملاندی ژ پانوراما ئازادی بۆ ناڤەندا باژێری. هەروەسا پێشانگەها دهوکا کەڤن وبازارێ ئازاد دێ ل هەمان دەم ل پارکا نەوروز هێتە ڤەکرن.

 پێشانگەها وێنێن دهوکا کەڤن، ل ژێر ناڤێ "دهوک باژێرێ جوان وجامێر وتەنا"یە و ژ ئەرشیف وبەرهەڤکرنا هونەرمەند ورۆژنامەڤان شڤان توفیق بەرپرسێ رێکخراوا ئەرشیفە، ناڤهاتی بۆ کوردیو گوت "ئەڤ پێشانگەهە پێکدهێت ژ وێنێن کەڤن یێن باژێرێ دهوکێ و زاخۆ و ئامێدی وئاکرێ، دگەل وێنێن دهوکێ یێن نوی".

دڤی کەرنەڤالی دا چەندین هونەرمەند ژ هەمی کوردستانێ دپشکدارن وجل وبەرگێن ل سەردەمێ پاشاتیێ ل عیراقێ هێنە نیشان دان و ل رۆژا دووێ ژی نمایشێن تیپێن مللی یێن هەولێر وسلێمانی ودهوک وشاریا هێنە نیشاندان وئەڤ کەرنەڤالە دێ ب بەلاڤکرنا چەند خەلاتان بدوماهی هێت.