ئەمڕۆ 10 ساڵ بەسەر دامەزراندنی كەناڵی ئاسمانی سپێدەدا تێدەپەڕێت

16/06/2019 - 12:05 بڵاوکراوەتەوە لە هەواڵ/كوردستانی

 

ئەمڕۆ 10 ساڵ بەسەر دامەزراندنی كەناڵی ئاسمانی سپێدە تێدەپەڕێت و لەو ماوەیەدا كەناڵەكە هەزاران بەرنامەی جۆراوجۆری پێشكەش كردووەو هەمیشە مینبەری گەیاندنی دەنگی ناڕەزایی خەڵك بووە.

 

لە 16/6/2009 سپێدەیەكی نوێ بە رووی میدیای كوریدا كرایەوەو ئاسۆیەكی جیاوازی لە پەیامی پەروەردەیی و خەمی خەڵكی خرایە سەر شاشەی كەناڵێكی ئاسمانی، ئەویش بە دەستپێكردنی پەخشی كەناڵی ئاسمانی سپێدە بوو.

 

كەناڵی سپێدە وەكو زمانحاڵی یەكگرتووی ئیسلامی كوردستان كە داهێنەری یەكەم ئەزموونی ئۆپۆزسیۆن بوو لە هەرێمی كوردستان، كەناڵەكەش لەو روانگەیەوە لە پاڵ گەیاندنی پەیامی پیرۆزی ئیسلام، بووە گەیەنەری دەنگی ناڕەزایی خەڵك و لەم رێگەیەوە هەموو چین و توێژەكان خۆیان دەبینییەوە.


بەبۆنەی ساڵیادی دامەزراندنی كەناڵەكە، بەرێوەبەرایەتی كەناڵی ئاسمانی سپێدە پەیامێكی پیرۆزبایی بڵاودەكاتەوەو رایدەگەیەنێت: لە دەیەمین ساڵیادی پەخشی كەناڵی ئاسمانی سپێدە دا گەرمترین پیرۆزبایی لە بینەران و كارمەندانی كەناڵەكەمان دەكەین.

 

دەقی پەیامەكە:

پەیامی پیرۆزبایی كەناڵی ئاسمانی سپێدە

لە دەیەمین ساڵیادی پەخشی كەناڵی ئاسمانی سپێدە دا گەرمترین پیرۆزبایی لە بینەران و كارمەندانی كەناڵەكەمان دەكەین.

سپێدە وەك شەماڵێكی فێنك لە دە ساڵی رابردودا میوانێكی بەردەوامی خێزان و ماڵەكانی كوردستان بووە، لەم یادەدا جەخت لەسەر پەیامی سیاسی و پەروەردەی خۆی دەكاتەوە كە هەمیشە ئاراستە و ئامانجەكانی تەبا بووە بە كەلتور و بەها كۆمەڵایەتیەكانی كۆمەڵگەی كوردستانی.

لە سپێدەوە پەخشی پەیامی سیاسی راستگۆیانە و پەیامی پەروەردەی دروست و دەستخستنە سەر برینەكان وەك ئەوەی هەن سیمای دیاری دەساڵی رابردووی بووە.

لەم یادەدا رێز و پیزانین بۆ هەموو ئەو بەڕێزانە دەردەبرین كە بە وشەیەك یاخود وینەیەك یان بە چركەیەك خزمەتی سپێدەیان كردووە، كە بێگومان بەرهەمی ئەو هەوڵ و ماندوبونەیە سپێدەی ئەمرۆ بە گەشاوەتر و بە ستایلێكی جیاوازترەوە دەردەكەوێت.

لێرەوە رایدەگەینین سپێدە لە پەخشی كارە نەوعیەكانی بەردەوام دەبێت و بەستایلی نوێ و بەكۆمەڵێك بەرنامەی تازەی تەرفیهی و كۆمەڵایەتیەوە چاوی بینەرانی تێر دەكات.

لەم یادەدا لە خوای گەورە دەخوازین ئەوەی كردومانە وەك كارو كردارێكی پەیامدار لێ وەربگرێت و رەزامەندی ئەو تاكە ئامانج و ئاراستەمان بووە، جارێكی تر پیرۆزبایی خۆمان رادەگەیەنین .

بەڕێوەبەرایەتی كەناڵی ئاسمانی سپێدە
١٦ ی ٦ ی ٢٠١٩