قوربانیەكی چەكی كیمیایی داوایەك لەحكومەتی هەرێم و عێراق دەكات

18/06/2019 - 11:02 بڵاوکراوەتەوە لە هەواڵ/كوردستانی

 

بەركەتوویەكی چەكی كیمیایی كە ئێستا لە وڵاتی ئەڵمانیایە بە مەبەستی چارەسەركردنی، پزیشكەكانی ئەو وڵاتە مەرجیان بۆ داناوەو لەبەر قورسی مەرجەكان داوای هاوكاری لەحكومەتی هەرێم و عێراق دەكات.


كامیل عبدالقادر یەكێكە لە قوربایانی كیمیابارانی هەڵەبجە كە نازناوی شەهیدی زیندویان پێداوە لە تۆڕی كۆمەڵایەتی فەیسبوك دەڵێت:" لەبەر ئەوەی مەترسی زۆر هەیە لەسەر ژیانم لەڕووی تەندروستیەوە بەهۆی نەخۆشی لەكاركەوتنی سیەكانمەوە بەهۆی گازی خەردەلەوەو ئەگەر بگەڕێنرێمەوە بۆ عێراق ئەگەری مردنم هەیە ناچار ئەڵمانیا ڕازی بووە (مافی مانەوەی نەناردنەوە) م پێ بدات , پزیشكە ئەڵمانیەكان لەبەر ئەوەی كۆتا ڕۆژەكانی تەمەنم بەڕێ دەكەم و خۆری تەمەنم ڕوو لەئاوابوونە ڕازی بوون بەوەی نەشتەرگەری چاندنی سیەكانم بۆ ئەنجام بدەن بەڵام چەند مەرجێكیان بۆ داناوم، دوو مەرجیان ناتوانم بەتەنها خۆم جێ بەجێی بكەم" .


ئەو قوربانیەی چەكی كیمیایی ئاماژە بەو دوو مەرجە قورسە دەكات كە توانای جێبەجێكردنی نییە و لەو بارەیەوە وتی:" یەكەم فێربوونی زمانی ئەڵمانی و دووهەم نەمانەوەمە لەكەمپداو نیشتەجێ بوونمە لەشوێنێكی تایبەتدا یاخود شوقەیەكی سەربەخۆدا بۆ ئەوەی لە كەسانی دیكەوە توشی نەخۆشی تری ڤایرۆسی و میكرۆبی نەبم لەحاڵەتێكدا كۆئەندامی بەرگری لەشم لاوازەو جەستەم توانای ڕووبەڕووبونەوەی نەخۆشی دیكەی نەماوە , بۆ فێربوونی زمانی ئەڵمانی بەردەوام كۆشش دەكەم و پشتیوان بەخوا بەهاوكاری چەند دڵسۆزێك فێر دەبم؛ بەڵام بۆ دەرچوون لەم كەمپەدا زۆر پێویستم بە مناڵەكانمە كە لە بەرواری ۲۰۱۷/۱۱/۲۹ وە لێیان دابڕاوم و ناتوانم خۆم خزمەتی خۆم بكەم و بۆ هەموو شتێك پێویستم بەیەكێكە هاوكاریم بكات ".


هەروەها دەڵێت:" لەئێستادا وێڕای باری تەندروستی زۆر خراپم بە هاوكاری هەندێك برای بەڕێز خۆم ژیانی ڕۆژانەی خۆم زۆر بەسەختی لەو كەمپەدا بەڕێ دەكەم ، ئەگەر بەهانامەوە نەیەن ئەو دوو مەرجەی پزیشكەكان لەسەریان داناوم هەرگیز جێ بەجێ نابێت، لەبەر ئەوە داوا لەدەسەڵاتدارانی عێراق و هەرێم دەكەم كە ڤیزا بۆ مناڵەكانم وەربگرن تاوەكو لەنزیكەوە چاودێریم بكەن و خزمەتم بكەن بەتایبەتی پاش ئەنجامدانی نەشتەرگەری چاندنی سیەكان بۆم".


قوربانیەكەی چەكی كیمیایی لەكۆتایی قسەكانیدا ئاماژە بەوە دەكات:" لەحاڵەتێكدا نەشتەرگەریەكەم بۆ ئەنجام بدرێ و منداڵەكانم لام نەبن و خزمەتم نەكەن ڕەنجمان بەخەسار دەچێ و نەشتەرگەریەكە شكست دێنێ و مەترسی زۆر گەورەتر لەسەر ژیانم دروست دەبێت , هێشتا چاوەڕێم گوفتارەكانتان بكەن بە كردارو بەهانامەوە بێن پێش ئەوەی گیان لەدەست بدەم؛ چونكە پاش مردنم دروشم و شیوەنی كەستانم ناوێ ".


جێگەی ئاماژەیە كامیل عبدالقادر یەكێكە لە بەركەوتەكانی چەكی كیمیایی و چەندینجار بەمەبەستی چارەسەر سەردانی وڵاتانی ئەوروپای كردوەو لە ئێستادا ماوەی دوو ساڵە لەوڵاتی ئەڵمانیایەو چاوەڕوانی نەشتەرگەری چاندنی سیەكانی دەكات لەلایەن پزیشكە ئەڵمانیەكان.

 

 

 

هـ س