ئەپڵ نیازی ئەم پڕۆژە زەبەلاحەی هەیە

13/07/2019 - 08:07 بڵاوکراوەتەوە لە هەواڵ/تەكنەلۆژی

 

 

گەورە كۆمپانیای ئەپڵ بە نیازە ملیۆنەها دۆلار تەرخان بكات بۆ گەشەپێدانی خزمەتگوزاریی (+Apple TV).

لەكاتێكدا كۆمپانیای (Apple) ی ئەمریكی خەریكی خۆ ئامادەكردنە بۆ كێبڕكێ لەبواری پەخشكردنی ناوەڕۆكی كەیفخۆشی، ڕاپۆرتەكان چەند وردەكارییەكی تر ئاشكرا دەكەن كە ئەو كۆمپانیا زەبەلاحە بەنیازە لەقۆناغی داهاتوودا كاریان تێدا بكات، لەوانەش دەیان ملیۆن دۆلاری تەرخان كردووە بۆ كاركردن لەپرۆژەی تایبەت بە خزمەتگوزاری (+Apple TV) ئەركی ئەم خزمەتگوزارییەش نمایشكردنی بابەتی سینەماییە كە كێبڕكێ دەكەن بۆ بەدەستهێنانی خەڵاتی ئۆسكار.

لەو چوارچێوەیەدا ڕۆژنامەی نیویۆرك پۆست ئاماژەی بەوەداوە ئەپڵ بە نیازە 5 بۆ 30 ملیۆن دۆلار لە هەموو پرۆژەیەكی سینەماییدا خەرج بكات كە خۆی بەرهەمی دێنێت، ئەویش بۆ بەدێهێنانی ئامانجەكەی، هەر ئەو ڕۆژنامەیە زانیویەتی كۆمپانیای ئەپڵ بەهیوایە لەسەر بودجەی ئەمساڵ پارە بۆ 6 فیلمی كورت تەرخان بكات و چەند فیلمێكی هاوشێوەی فیلمەكانی (Boy Erased) كوڕی سڕدراوەو (BlacKkKlansman) كلانس مانی ڕەش و (Dallas Buyers Club) كڕیاری یانەی دالاس) بەرهەم بهێنێت.

ئەمەش لە كاتێكدایە كۆمپانیای ئەپڵ لە نۆڤێمبەری ساڵی ڕابردوودا هاوبەشییەكی ئیمزا كردووە لەگەڵ كۆمپانیای (A24) ی بەرهەمهێنەری فیلمی (Moonlight) كە یەكێكە لەو فیلمانەی خەڵاتی ئۆسكاری 2017 ی پێبەخشراوە.

لەكانوونی دووەمی ئەمساڵیشدا كۆمپانیای (Apple) ئاشكرایكرد، بەهاوكاری كۆمپانیای (A24) بەم نزیكانە یەكەمین فیلمی هاوبەشیان بە ناوی (On The Rocks) (لەسەر تاشە بەرد) نمایش بكەن كە لە نواندنی هەردوو ئەكتەری بەناوبانگ (رشیدە جونز و بیل مۆرای) یە.

مەزەندە دەكرێت كۆمپانیای (Apple) ڕووبەڕووی كێبركێیەكی گەرم ببێتەوە لەگەڵ چەند كۆمپانیایەكی دیكەی وەك (نیتفلێكس و ئەمازۆن)، بەتایبەت كە كۆمپانیای ئەپڵ هەوڵدەدات بۆ بەرهەمهێنانی چەند كارێك بۆ ئەوەی ببێتە كێبڕكێكاری كۆمپانیاكانی دیكەی بەرهەمهێنانی فیلم لە ڤیستیڤاڵە گەورەكانی وەك ڤیستیڤاڵی ئۆسكار.

كەشتی نووح