ئایفۆن 11 دەكەوێتە بە بازاڕ

02/09/2019 - 08:56 بڵاوکراوەتەوە لە هەواڵ/تەكنەلۆژی

 

 

كات و بەرواری ناساندنی مۆبایلە نوێكەی ئەپڵ دیاریكرا كە ساڵێكە خەڵكێكی زۆر لە چاوەڕوانیدان، ئەمجارەیان ئەپڵ وەكو نەریتێكی بەردەوام لە شاری سان فرانسیسكۆی ئەمریكا مۆبایلی ئایفۆن (11)، ئایفۆن (11) ماكس و ئایفۆن ئێكس ئار (2019) دەناسێنێت.

بڕیار وایە كۆمپانیای ئەپڵ لە بەرواری (10/9) ی ئەمساڵ بەرهەمی نوێی كۆمپانیاكە بناسێنێت كە بریتین لە ئایفۆن (11)، ئایفۆن (11) ماكس و ئایفۆن ئێكس ئار (2019) كۆمپانیای ناوبراو ئەمجارەیان گۆڕانگاری لە بەشی دواوەی مۆبایلەكە ئەنجامداوەو گۆڕانكارییەكانیش بوونە هۆی سەرنجی خەڵك.

بەپێی ئەو زانیارییانەی كە لە ئینتەرنێت دزەی پێكراوە، ئەمجارەیان كۆمپانیای ئەپڵ (3) مۆبایل دەناسێنێت. یەكەمیان ئایفۆن (11) یە كە سكرینەكەی (5.8) ئینجە، دووەمیان ئایفۆن (11) ماكسەو سكرینەكەی (6.5) ئینجە، لەلایەكی دیكەوە ئایفۆن ئێكس ئار (2019) (6.1) ئینجە.

ئەوەی جێگەی سەرنجە، بەشی كامێرای مۆبایلەكەیە كە گۆڕانكارییەكەی بەرچاوی تێدا روویداوە، گۆڕانكارییەكەی بریتییە لە زیادكردنی كامێرایەكی دیكە واتە سێ كامێرا بۆ ئایفۆنی (11) و ئایفۆن (11) ماكس كە ئەمە بۆ یەكەمین جارە شتێكی وا لەلایەن كۆمپانیاكەوە بكرێت، هاوكات فلاشێكیشی لێدی لەگەڵدایەو بەشی كامێرا لەنێو چوارگۆشەیەك دیزایین كراوە، بەڵام وردەكاری زیاتری كامێراكەو تواناكانی جارێ نەخراوەتەڕوو.

بەپێی سەرچاوەیەكی نزیك لە كۆمپانیای ئەپڵ، ئایفۆنە نوێیەكان سیستەمی (Face ID) تێدا بەكار نەهاتووەو لشوێنی ئەو پەنجەمۆری لەنێو شاشەكە جێگیركردووە.

خەسڵەتێكی دیكە بۆ ئایفۆن زیاد دەكرێت ئەویش (Night Sight) ە كە دەبێتە هۆی گرتنی وێنەی جیاواز لە كاتی شەوو تاریككردنی وێنەكان بە كاتی رۆژ.

سەرچاوە/ تەبا