سەد سال بورین و مە ب خوە چ نەکر

 

سالار دۆسکی

سەد سال بورین ژ سایکس بیکو گەلەک شورەش دژی سنورێن ب خامەی ھاتینە کێشان سەرھلدان و گەلەک گەنجان خوە کرە قوربان و گەلەک دەربدەرەی و دەردەسەری مە دیتن و چ نەما د گەل مللەتێ کورد نەھاتیەکرن و ب ملیۆنان مرۆڤ ھاتینە بن ئاخکرن و ھەموو ژی ئەنجامێ ڤێ رێکەفتنێ کو ھەر چ ھزر بۆ مللەتەکێ چل ملیۆن مرۆڤ نەھاتەکرن و ھەتا نوکە ژی کورد یێ خویکا وێ دەن.

راستە ل ھەر پارچەکا کوردستانێ یا کەفتیە سەر ب ئەڤان وەلاتێن داگیر کەرڤە زولم و زورداری دژی مللەتێ کورد ھەیە و ھەبوویە و بەردەوام دژاتی یا ھەمی مافێن مللەتێ کورد کریە، لێ ئەڤە ھەموو ژ ڤێ رێکەفتننامێ دەرکەفتیە و ھەر چ ھاتبیتە سەرێ مللەتێ کورد ھەر ئەڤ وەلاتە و ئەف کەسە ئەگەر بووینە، ئەڤە ١٠٠ سال دەربازبوون و کەش و ھەوایی نوکە نەوەکی بەری ١٠٠ سالانە، نوکە پێشمەرگە بەرامبەر دورندەترین ھێزا تیرۆرستی ل سەر عەردی شەری دکەت و قارەمانە ل سەرانسەری جیھانێ و دەنگ ڤەدایە و ھەلگرێ پەیامەکا پیرۆز و دیسا بۆ ھەموو جیھانێ دیاربوو کو مللەتێ کورد مللەتەکێ ئاشتی خوازە و حەز ئاشتیێ دکەت و ھەکە دژی عەرەبان با، عەرەبان ژ دارمەزراندنا دەولەتا عیراقێ ھەتا نوکە چ خێر د گەل نەکرینە و نەبرا بووینە و بتنێ کوشتن و تالان و رەڤین و دەردەسەری دیتی یە و بەرامبەر مللەتێ کورد ڤی شەری دا نێزیکی دو ملیۆن ئاواران خوە کومکرینە و سەرەرایی قەیرانێن دارایێن مەزن کو سەر مللەتێ کورد ھاتینە و ئەڤ شەرێ ھاتیە سەپاند سەر کوردان.

لێ خالا من دڤێت ل سەر ب راوەستم و تایبەت بورینا ١٠٠ سالان ل سەر ئەڤێ رێکەفتنا نەخوەش یا مللەتێ مە کەفتیە بن زولم و زورداریێ ھەر جھەکێ دونیایێ بیت، بینم ئەڤ رۆژە گەلەک ب ئاسایی دەربازبوو، دبینم ھەلکەفتێن حزبی و بیرھاتنێن کێم بھا گەلەک گەرم تر دەرباز دبوون و شاشێن مەدیایێ ب رۆژان بەرھەڤی بوو دکرن، دبینم ئەنجامدانا کونفرانسەکی یان روونشتنەکا زانکۆیێ و سمینارەکێ نە دەنگێ نەرازیبوونێ یە تو بۆ جیھانێ دیارکەی کو ئەڤان ١٠٠ سالان دا چ ب سەر ڤی مللەتی ھاتیە، یا ژ ھەمیا گرنگتر من دیت ھەر مە ب خوە گۆت وەکی علکی دچی و دچی ب کوردی بۆ کوردی، ئانکو ئەم نەشیاین پەیاما خوە بگەھینە دەرڤە، دڤیابا مە ڤێ بیرھاتنا نەخوەش جیھان ھەژاند با و ھەموو کوردستانێ و ھەر جھەکێ کورد لێ مە دەنگێن نەرازیبوونێ و ب زمانێن جودا و ھەموو دنیایێ بلندکربان کو ئەڤە ١٠٠ سال بوروین ئەم بن زولم و زورداریێ و ئێدی بەسە.