سایكس بیكۆ....داعش ....كورد

 


ئەگەر چەخماخەی جەنگی جیهانی یەكەم بەهۆی تیرۆر كردنی (ئەرشیدۆقی) پادشای ئەوكاتی وڵاتی (مەجەر) و (نەمسا) ی ئەمڕۆ لەلایەن قوتابیەك بەناوی (جفریلو برەنسیب) ی صربی سەری هەڵدابێت، دەی ئەوا چەخماخەی هەڵگیرسانی ئەو جەنگەی ئەمڕۆی كە ڕۆژهەڵاتی ناوەڕاستی گرتۆتەوە ، كە ئەمیش جەنگێكی جیهانییە بەڵام بەبێ‌ ناولێنان، لەو ئاگرەوە كڵپەی سەند كە كەسێك بەناوی (محمد بو عزیز) لە جەستەی خۆی بەردا لە كاردانەوەی لە بەرامبەر دەسەڵاتدارانی تونسدا.


بەهاری عەرەبی:
هەمومان شۆڕشەكانی 2011 ی وڵاتانی عەرەبیمان لە بیرە كە بە ( بەهاری عەرەبی ) ناوزەدكرا، سەرەتا لە وڵاتی تونسەوە سەری هەڵدا و پاشن وڵاتی میسر و دوای ئەویش لیبیا لە باكوری كیشوەر ئەفریقا و پاشان پەڕیەوە بۆ بۆ بەری كیشوەری ئاسیای وڵاتانی عەرەبی ئەویش وڵاتی یەمەن و دوای ئەویش وڵاتی سوریا، درێژەكێشان و خوێناوی بونی شۆرشی گەلانی سوریا و دەستێخستنی لەلایەن وڵاتانی ناوچەكە ودونیاوە شۆڕشەكانی بەهای عەرەبی ڕاگرت.
سەرەتا ئەو شۆرشانە بۆ چەسپاندنی دادگەری كۆمەڵایەتی و باشتر كردنی گوزەرانی خەڵكی بو دژ بەو دەسەڵاتە ئیستبدادیانەی كە چەند دەیەیەك بوو دەستیان بەسەر دەسەڵاتدا گرتبوو،شۆڕشەكانیش تا ڕاددەیەك ئامانجیان پێكا ، هەر هیچ نەبێت ڕژێمەكان و سەرانی ڕژێمەكان لادران، هەرچەندە لە وڵاتی میسر كودەتای سەربازی و دەستی دەرەكی نەیهێڵا شۆڕشەكە بە ئامانجەكانی خۆی بگات، دیسان لە وڵاتی یەمەنیش جەنگی مەزهەبی و دەستی دەرەكی نەیهێڵا ئەو شۆڕشەش ئامانجەكانی وەدی بێت، هەرچەندە تا ئەمڕۆشی لەگەڵدا بێت ڕەوشی ئابوری و ئاسایشی ئەو وڵاتانە سەقامگیر نەبووە، بەڵام سنوری ئەو وڵاتانە سەقامگیرە و ئاریشەكانیان بە ئاریشەی ناوخۆیی دەزانرێت.


ئەی بۆ سوریا جیاواز بوو؟
بەڵام بۆ شۆڕشی گەلانی سوریا جیاواز بو لە شۆڕشەكانی وڵاتانیتر ؟؟؟ شۆڕشەكەی سوریا ئەوە پێنج ساڵە درێژەی هەیە و شۆڕشەكە سەریكێشا بۆ جەنگی خوێناوی بووە هۆی وێران بونی سەرخان و ژێرخانی ئابوری ئەو وڵاتە و كوژرانی سەدان هەزار هاوڵاتی و ئاوارە بونی ملیۆنانیتر ، ئەو جەنگەی ئەمڕۆ لە سوریا دەگوزەرێت تەنها جەنگی ناوخۆیی ئەو وڵاتە نییە، بەڵكوو جۆرێكە لە جەنگی جیهانی بەڵام بەبێ‌ ناو هێنان، چونكە ڕاستەوخۆ هەموو وڵاتانی ناوچەكە و وڵاتانی ئەوروپا و زلهێزانی وەك ئەمریكاو ڕوسیاش بەشدان لەو جەنگەدا، ئەوو جەنگە تەنها لە نێوان دوو جەمسەردا نیە ، ئەم جەنگە جیاوازە لە جەنگەكانیتر چونكە فرە جەمسەرە و شەراكەتیكی رونیش لە نیوان جەمسەرەكاندا هەیە ، وەك داعش بەتەنها لەلایەك ، چونكە هاوپەیمانەكانی دیار نیین، ڕژێمی سوریاو هاوپەیمانەكانی ، پێشمەرگە و هاوپەیمانەكانیان لە هەرێمی كوردستان و یەپەگە و هاوپەیمانەكانیان لە ڕۆئاوای كوردستان و سوپای عێراق و هاوپەیمانەكانیان و ئۆپۆزسیۆنی سوری و هاوپەیمانەكانیان و جەبهەی نوسرو هاوپەیمانەكانی ،ئەم جەنگە فرە ڕەنگ و فرە دەنگە كەوتۆتە سنورێكی دیاریكراوەوەكە ئەویش ڕۆژهەڵاتی ناوەراستە، وبەكورتیەكەی جەنگەكە لەسەر سنوری نەخشەی (سایكس بیكۆ)یە.


ئایا سەرهەڵدانی داعش كۆتایی بە سایكس بیكۆ دێنێت؟
• - بۆچی شۆڕشەكانی تری بەهاری عەرەبی لە سنوری وڵاتەكانیان دەر نەچون، بەڵام ئەوەی سوریا هەموو وڵاتانی سنوری سایكس بیكۆی گرتەوە؟
• - بۆچی مانەوە ی بەشار ئەسەد و ڕژێمەكەی ئەوەندە درێژەی كێشا؟
• - نەك وڵاتانی سنوری سایكس بیكۆ ، ئەی بۆ هەموو زلهێزانی دونیا هاتونەتە سەرخەت وبوون بە بەشێك لەو شەڕەی ئەمڕۆ؟
• - جەمسەرەكانی ئەم جەنگە ئاڵۆز تێكەڵن، زلهێزەكان زیاد لە جەمسەرێك یاری بە كارتەكانیان دەكەن !!!
• - بۆچی هەموو وڵاتانی ناوچەكە و هەموو زلهێزانی دونیاش داعشیان پێ‌ لەناو نابرێت!!! تۆ بڵاێیت ئەو ڕێكخراوە هێندە بە هێز بێت؟
• - پاش سەد ساڵ لە سایكس بیكۆ ئایا ئێستە كاتی هاتووە كە دەسكاری سنورەكان بكرێتەوە؟
ئەمانە كۆمەڵە گەمانێكن كە دەبێت بۆ هەر یەكێك لە كومانانە وەڵامی ڕون و باوەڕپێكراو هەبێی.


ئەگەر دەسكاری سنورەكان كرا؟
بەبڕوای بەندە ئەگەر دەسكاری سنورەكانی سایكس بیكۆ كرا ئەوە گەورەترین سود مەند لە ناوچەكەدا گەلی كورد دەبێت ، بەڵام ئەی ئەگەر جەنگی داعش و ڕژێمی سوریاش كۆتاییان هات و دەسكاری هیچ كام لە سنورە دەسكردەكان نەكرا چیی؟ ئاخر خۆ هیچ مادە و خاڵێكی ئەو ڕێكەوتنە باس لە هەڵوەشانەوەی ئەو رێككەوتنە ناكات بۆ پاشی سەد ساڵ!!! ئاخۆ ئەم پێداگیریەی ئێمە بۆ هەڵوەشانەوەی سایكس بیكۆ ی پاش سەد ساڵ لە چیەوە سەرچاوەیگرتووە؟ ئەگەر تەنها بیناكردنە لەسەر ئەوەی كە بە كرداری سنورە دەستكردەكانی سایكس بیكۆ هەڵوەشاوەتەوە ، ئەوە بەڵگەیەكی بەهێز نیە بۆ ڕاگەیاندنی دەوڵەتی كوردی، بەڵێ‌ هەموو زلهێزانی ئەمڕۆ بە خاوەنانی پرۆژەكەی سایكس بیكۆشەوە دان بەو هەڵە مێژوویەدا دەنێن كە چ زوڵمێكیان لەگەلی كوردكردووە.


ئێمە ئەمڕۆ ئامادەین بۆ ئەركە مێژوییەكە:
ئەمڕۆ هێزی پێشمەرگە نەك ڕاستەوخۆ بەشدارە لە شەڕی دژی داعش بەڵكو بەشاهێدی نوێنەرانی دونیا و كۆمەڵگەی نێو دەوڵەتی ئەمڕۆ پێشمەرگە لە جیاتی جیهان شەڕدەكات، سەركەوتنی هاوپەیمانان لەم جەنگەدا واتە سەركەوتنی ئێمەش، لێرەدا جێگەی خۆیەتی بپرسین ئایا هاوپەیمانان هیچ گرەنتیەكی نوسراو یان زارەكیان داوە بە كورد بۆ پاش جەنگی داعش ؟ یان وەك پیشەی هەموو جارێكیان كە كاریان پێمان نەما دەماندەنەوە دەست ئەو قەدەرە كە ئەوان بۆمان دیاری دەكەن؟؟؟ یان ئایا لە ناوخۆی خۆماندا هیچ ئامادە كاریەكمان كردووە بۆ ئەو كارە گرانە مێژوییە؟ ئایا ناو ماڵی خۆمان یەك خستوە؟ ئایا توانیومانە لۆبیەكی بەهێز لە دەرەوە بنیات بنێیین؟ ئەی ئایا هەنگاوی بەدیلمان چییە ئەگەر گۆڕانكاریەكان بەخواستی ئێمە نەبو؟ كارتەكانی فشارمان كامانەن؟ پێش كۆتایی هاتنی جەنگ هەموو ئەو پرسیارانە پێویستیان بە وەڵامی ڕون و موقنیع هەیە.
بە بڕوای بەندە هەرچی زووە پێویستمان بە یەكخستەوەی نێوماڵی خۆمان و ئاشتبونەوەی نیشتمانی هەیە ، هێزە سیاسیەكان بۆ لەخۆیان ناپرسن لە بەرامبەر ئەو گۆڕانكاریەی كە بڕیارە بێتە ئاراوە كەچی ئێمە لەهەموكات زیاتر پەرتەوازە و بێ‌ بەرنامە و ماڵ جیا و لێكترازاوین!!! لە ڕوی ئابوریەوە نا ئامادە ، لە ڕوی یاساییەوە هەرسێ‌ دەسەڵاتەكەی هەرێم لە ژێر پرسیاری جەوهەریدان بە جۆرێك شەرعیەتی یاساییان لەدەست داوە، ئایا بەم حاڵەوە دەتوانیین قۆناغەكە بەسەر كەوتویی تێ پەڕێنیین؟؟؟ باشە ئەگەر باش كۆتایی ئەم پرۆسە جیهانیە جارێكیتر ئێمە بە دەستی بەتاڵ لێی دەرچووین ئیتر گلەیی لە كێ‌ بكەین؟؟؟ كێ‌ تاوانباركەین؟؟؟ كێ‌ بەرپرسیاریەتی دەگرێتە ئەستۆ؟؟؟

 

am