كۆنگرەی (10) ی نەهزەی ئیسلامی و سەرنج و یادەوەریەكـ ؟

 

ڕۆژی هەینی ( 20 / 5 ) لە تونس كۆنگرەی (10)ی بزتنەوەی نەهزە ئیسلامیی بەڕێوەچوو ، لە سەرەتای كردنەوەی ڕێوڕەسمی كۆنگرەكە ( راشد الغنوشی ) ڕابەری بزوتنەوەی نەهزەی ئیسلامیی ووتی :‌ ئێمە سوورین لە سەر دورخستنەوەی ئایین لە جەنگـ و ململانێی سیاسی و داوا دەكەین مزگەوتەكان بەتەواوی بێ لایەن بكرێت لە ململانێی سیاسی و بەگەڕخستنی بۆ كاروباری حزبی بۆ ئەوەی شوێن و جێگای كۆكەرەوەی گشتی بێ نەكـ جیاوازی و دووبەرەكی !

هەروەها ووتی ئەم بزوتنەوەیە لە حەفتاكاندا هەتا ئەمڕۆ گەشە دەكات لە بزوتنەوەیەكی ئایدۆلۆژی كە خەباتی دەكرد لە پێناو ناسنامەدا بۆ بزوتنەوەیەكی بەرهەڵستكاری گشتگیر بەڕوی ڕژێمە دیكتاتۆر و گشتگیریەكان لەوێشەوە بۆ حزبێكی دیموكراسی نیشتمانی یەكلا بووەتەوە بۆ كاری سیاسی بە مەرجەعی‌ نیشتمانی وەرگیراو لە بەهاكانی ئیسلام !؟ سەرباری ئەم تەراجوعە كە لە گۆڕینی ناوو دواتریش كاڵكردنەوەی ناوەڕۆكـ و ئەوجا هانا بردن بۆ ناوو نازناوی هاوڕێ عەلمانیەكانی ووڵاتەكەی ، هێشتا لە شەقامی ئەو ووڵاتە بەلای چاودێرانەوە بەم شێوەیە پێشوازی لەم هەنگاوەی ڕاشد الغنوشی دەكەن وەكـ دەڵێن : ئەم حزبە ئیسلامییە بە هەمان ڕیتمی ( ئیسلامیەكەی ) جارانی خۆی سەما دەكات بەڵام تەنها ئاوازەكەی گۆڕیوه ‌ !


ڕەنگە ئەو سیاسەتەی كە لە ئێستادا لە ئاستی ناوخۆ و دەرەوەی ووڵاتانی ئیسلامیی دەگیرێتە بەر بۆ بە جنۆكەكردنی ئایینی ئیسلام و ناشیرینكردنی مێژووی موسڵمانان ، بایی ئەوەندە بێ سەركردایەتی ئەو حزبەی قایل كردبێ هەنگاویكی لەم جۆرە بگرێتە بەر ، بەتایبەتی پاش كودەتا سەربازیەكەی سەرانی میسر بە سەر شەرعییەتی محمد مورسی و لادانی حكومەتێكی هەڵبژێردراوی جەماوەری بۆ داگیركاری و خۆسەپاندن بە زەبری هێز ، هەروەها دژە شۆڕشەكانی پاش بەهاری عەرەبی ئیسلامیی ئیخوانی لە ناوچەكە .. !


بەهەر حاڵ ئەوەی مایەی سەرنجە كە دەبوو بە پێچەوانەشەوە بزوتنەوەی نەهزەی ئیسلامیی لە تونس و تەواوی ئیسلامیەكان وەكـ خۆی واقیعەكە بخوێنەوە پەندی لێ وەربگرن ، ئەوحەقیقەتەیە كە دوژمنان و ناحەزانی تەوژمی ئیسلامیی و موسڵمانان بەگشتی ، هەروا بە ئاسانی لێناگەڕێن و دەستەوسان ڕاناوەستن بەدیار گەشەكردن و فراوانبوونی پێگەی جەماوەری و دواتریش ببیتە مایەی ترس و سەرچاوەی هەڕەشە بۆ سەر دەسەڵات و بەرژەوەنیەكانیان ! بەڵكو ئەوان هەتا دوا هەناسەی سازش و پاشگەزبوونەوە لە گەڵتا دێن و ئەكۆشن لەو باڵندەیە بچی كە بە دەست و پەنجەی خۆیان وێنای بۆ دەكێشن ،

خوای گەورە لە قورئانی پیرۆزدا دەفەرمێت .. ( وَلَن تَرْضَىٰ عَنكَ الْيَهُودُ وَلَا النَّصَارَىٰ حَتَّىٰ تَتَّبِعَ مِلَّتَهُمْ ۗ  هەرگیز جولەكه و گاورەكان له تۆ (ئەی محمد ( صلی الله علیه وسلم ) ئەی ئیماندار ڕازی نابن هەتا به تەواوی شوێن ئاین و بەرنامەیان نەكەویت ) سورەتی البقرە ... هەروەها دەفەرمێت .. ( وَلَا يَزَالُونَ يُقَاتِلُونَكُمْ حَتَّىٰ يَرُدُّوكُمْ عَن دِينِكُمْ إِنِ اسْتَطَاعُوا ۚ واتە بەردەوام دژتان دەجەنگن هەتا واتان لێبكەن له دین و ئاینتان پاشگەز ببنەوە ئەگەر بۆیان بكرێت ) سورەتی البقرە ... بۆ ئەوەی لە سەرنجەكەی بەندە و واتای ئەم دوو ئایەتە تێ بگەین هەر لە میسر ئەمێنینەوە ئەوان وەكـ نموونە وەردەگرین ، مەعلومی هەموولایەكە پاش كودەتاچیەكەی عبدالفتاح سیسی زیاتر لە (40000) هەزار سەركردەی پلەیەكـ یەك و دوو و سێی ڕیزەكانی ئیخوان لە بەندیخانەو لە ژێر هەڕەشەی كوشتن و لێدان و سوكایەتیدان ، ئەوەشی كە ماوە بە ڕۆژی ڕووناكـ و بە بەرچاوی دەزگا ئەمنیەكانەوە بە شێوەیەكی ئاشتی و دوور لە تووندووتیژی و پێكهەڵبژان ڕۆژانە خۆپیشاندان و ناڕەزاییی دەردەبڕن و دەڕژێنە سەر شەقامەكانی ئەو ووڵاتە ، كودەتا و خۆسەپاندنی دەسەڵاتەكەی سیسی ڕەدەكەنەوە ، كەچی هەر كارێكی توندڕەویی و تەقینەوەو ترۆر ڕوو دەدات ئەیخەنە ئەستۆی كۆمەڵی ئیخوان و لایەنگرانی شەرعیەتی محمد مورسی ، لە گەڵ ئەوەشدا بەلای زۆرێكـ لە دانیشتوانی میسر بەشێكـ لەو كارە تیرۆریستیانە دەزگا ئەمنی و هەواڵگیریەكانی سەر بە عبدالفتاح سیسی بە‌ هۆكاری سەرەكی پشێویی و تەقینەوەكان لە قەڵەم ئەدەن !


لێرەوە دەچمەوە سەر یادەوەریەكـ كە دەگەڕێتەوە بۆ ناوەڕاست و پێش كۆتایی نەوەدەكانی ئەزموونی دەسەڵات و ئیداریی حكومەتی هەرێمی كوردستان ، دیارە بە حوكمی قۆناغەكەو ئەو یەكـ دوو شەڕو پێكدادانەی نێوان بزوتنەوەی ئیسلامیی و یەكێتی نیشتمانی ، ناوە ناوە ئەندام و لایەنگرانی حزبە ئیسلامیەكان بە گشتی و برایانی بزوتنەوەی ئیسلامیی بەتایبەتی ڕووبەڕووی گرتن و ڕاوەدانان و ئازار ئەبوونەوە ، شەوێكـ بە مەبەستی بەسەركردنەوە و گەیاندنی ئەركی درواسێتی سەردانی ماڵە دراوسێكمان كرد لە گەڕەكەكە ، پاش حیكایەت و باس و خواسی تایبەت هاتینە سەر مامەڵەو هەڵسوكەوتی ئەوكاتەی حكومەت بە رانبەر بە ئیسلامیەكان كە بەو جۆرە ململانێی نەیارەكانی دەكات ، دواتر خاوەن ماڵ ووتی فڵانی ناسراومان ئەم مانگی ڕەمەزانەی كە ڕابوورد چەند ڕۆژێكی كەم نەبێ بە ڕۆژوو نەبووە ! منیش بە سەرسوڕمانەوە لێم پرسی بۆچی !؟ خۆ ئەو پێاوە ئەهلی مزگەوت و جومعەو جەماعەتە ! لە وەڵامدا ووتی لە ترسی ئەوەی پێی نەڵێن ئیسلامییەو سەر بە ئیسلامییەكانە بەو مانگە پیرۆزە بە بەردەم بارەگا حزبیەكان جار جار سوڕاوەتەوە‌ و دەستی كردوە بە گڵۆبه ‌ڕۆژە توكاندن و ئەوویست پیشانی بدا نەكـ هەر ئیسلامی نیە بەڵكو ئەوەتا بەم مانگە پیرۆزە بە ڕۆژوو نیەو زۆر لە مزگەوت و كۆڕو كۆبوونەوەی ئیسلامییەكانیشەوە دوورە !؟ ... لێرەوە ئەم پێشهاتەی ( بزوتنەوەی نەهزەی ئیسلامیی لە تونس ) و مامەڵەی كودەتاچییەكانی میسر و هاوڕێی ماڵە دراوسێكەی ئێمە بخوێنەوە ..!؟
: