پاره‌ی‌ ئه‌م وڵاته‌ له‌ كوێیه‌

كاتێ‌ خه‌ڵك داوای‌ مافی‌ خۆی‌ ده‌كات، قسه‌ له‌سه‌ر ئه‌وه‌ نیه‌ ئه‌و خه‌ڵكه‌ كارده‌كات یان نا، مامۆستا وانه‌ ده‌ڵێته‌وه‌ یان نا، فه‌رمانبه‌ر كاره‌كانی‌ رای‌ ده‌كات یان نا، پێشمه‌رگه‌ ده‌جه‌نگێ‌ یان نا، چونكه‌ ئه‌وه‌ په‌یوه‌ندی‌ به‌سیستم و ده‌سه‌ڵاته‌وه‌یه‌، تۆ موچه‌ بده‌و ژیانی‌ خه‌ڵك دابین بكه‌، ئه‌و ده‌م هه‌ر كه‌س كه‌م و كوڕی‌ هه‌بو سزای‌ بده‌و لێپرسینه‌وه‌ی‌ له‌ گه‌ڵ بكه‌، ئاخر ناكرێ‌ وڵاتێك ژماره‌ی‌ هاوڵاتیانی‌ نه‌گاته‌ "5"ملیۆن و نیو، نه‌وت بفرۆشێ‌، غاز تاڵان بکرێت، باج وه‌ربگرێ‌، گومرگی‌ هه‌بێ‌، به‌ڵام موچه‌ی‌ بۆ نه‌درێ‌، ئه‌وه‌ جگه‌ له‌ كاره‌سات هیچی‌ تر نیه‌، له‌ 1991وه‌ پاره‌ دێته‌ ئه‌م وڵاته‌وه‌و نامێنێ‌، له‌ 2003شه‌وه‌ به‌ لێشاو له‌ به‌غدای‌ ده‌چننه‌وه‌و لێره‌ی‌ حه‌په‌لوش ده‌كه‌ن، ئه‌مه‌ چ ناوێك هەڵدەگرێ؟ ئه‌وه‌ی‌ ده‌رهه‌ق به‌ نه‌وت و غازی‌ كوردستان ده‌كرێ‌ مادام پاره‌كه‌ی‌ دیار نیه‌، مادام كه‌س نازانێ‌ چۆن ده‌فرۆشرێ‌ و چۆن پاره‌كه‌ی‌ دێته‌وه‌ و چی‌ به‌سه‌ر دێ‌، جگه‌ له‌ جۆرێك له‌ دزی‌ هیچ ناوێكی‌ تر هه‌ڵناگرێ‌، ئێ‌ هه‌ڵبه‌ت خه‌ڵك هێشتا زۆر باشه‌، خه‌ڵك داوای‌ مافی‌ خۆی‌ ده‌كات نه‌ك دانه‌ دادگای‌ ئه‌وانه‌ی‌ سه‌روه‌ت و سامانه‌كه‌ی‌ ده‌به‌ن و ده‌یخۆن.

ئه‌و پاره‌یه‌ی‌ ده‌ست به‌رپرسانی‌ ئه‌م وڵاته‌ ده‌كه‌وێت، ئه‌گه‌ر ده‌ست وڵاتێكی‌ سیستماتیك و خاوه‌ن ئاكاری‌ سیاسی‌ و ئابوری‌ بكه‌وێت، به‌ چه‌ند ساڵێك ده‌توانێ‌ وڵات بكاته‌ به‌ هه‌شت، نه‌ك ئه‌و دۆزه‌خه‌ی‌ ئێستاو هه‌ر رۆژه‌ به‌ درۆیه‌ك فریومان ده‌ده‌ن، ئه‌و پاره‌و سامانه‌ی‌ له‌م وڵاته‌وه‌ براوه‌و ئه‌سه‌ری‌ نیه‌ له‌ هیچ كوێی‌ دنیا ئه‌وه‌ نه‌كراوه‌ ته‌نانه‌ت له‌ وڵاته‌ دیكتاتۆره‌كانی‌ وه‌ك عێراقی‌ سه‌رده‌می‌ دیکتاتۆریەت و میسری‌ موباره‌ك و لیبیای‌ قه‌زافیشدا، ئه‌وان بۆ رۆژێ‌ موچه‌یان دوانه‌خست، پشتیان نه‌كرده‌ خزمه‌تگوزاری‌، نه‌یانهێشت گه‌نده‌ڵی‌ به‌و راده‌یه‌ شۆڕبێته‌وه‌، ئه‌وه‌ی‌ له‌م هه‌رێمه‌ ده‌گوزه‌رێ‌ كاره‌ساتێكه‌و هیچی‌ تر، ئه‌وه‌ی‌ ئێستا هیچی‌ له‌ ئه‌نفال و كیمیابارانی‌ هه‌ڵەبجه‌ی‌ ده‌ستی‌ سه‌دام كه‌متر نیه‌، ئه‌و هه‌مو سوكایه‌تیه‌ به‌م میلله‌ته‌ له‌ پای‌ چی‌، ئاخر ئه‌وانەی ئیدیعای‌ ژیانی‌ باش و ئاینده‌ی‌ باش و ئازادی‌ و دیموكراسیان ده‌كرد له‌ كوێن، نابینن پێشمەرگە لە چ حاڵێکدایە، چۆن شه‌رم نایانگرێ‌ هه‌زاران پێشمه‌رگه‌و فه‌رمانبه‌ری‌ ئه‌م وڵاته‌ په‌ڕا‌گه‌نده‌ی‌ وڵاتان بون، ئه‌وان له‌ كوێن كه‌ ئازاری‌ ئه‌م میلله‌ته‌ نابینن، قسه‌ له‌سه‌ر سه‌ركرده‌ چه‌پ و راست و سیكۆلارو ئیسلامیه‌كانیشه‌، ئه‌وه‌ بۆ كه‌س هه‌واڵی‌ ئه‌و پاره‌ براوانه‌ ناپرسێ؟

ئێستا كه‌ میدیا لیپ كراوه‌ له‌ پڕوپاگه‌نده‌ی‌ سایكس بیكۆ، ئایه‌ ده‌ردی‌ ئێمه‌ سایكس بیكۆیه‌، ئه‌گه‌ر ئه‌وه‌ ده‌رده‌كه‌یه‌ بۆ کاتی خۆی باستان نه‌كرد، بۆ 1991 باستان نه‌كرد، بۆ كه‌ سیمێلكا داده‌خه‌ن باسی‌ ناكه‌ن، ئه‌وانه‌ی‌ باسی‌ سایكس بیكۆ ده‌كه‌ن سه‌ره‌ڕای‌ تێنه‌گه‌یشتن له‌و رێكه‌وتنه‌ ئێستا خۆیان درێژه‌ پێده‌رین، مه‌سه‌له‌كه‌ ئه‌وه‌ نیه‌، ده‌ی‌ هه‌مو كورد خه‌ون به‌ ده‌وڵه‌ته‌وه‌ ده‌بینێ‌ به‌ هه‌زاران وتاریشمان له‌و باره‌یه‌وه‌ نوسیوه‌، ده‌وڵه‌ت پڕوپاگه‌نده‌ی‌ سیاسیانه‌ نیه‌، كێشه‌ی‌ ئێستا قوتی‌ خه‌ڵكه‌ قوته‌كه‌ دابین بكه‌ن و ئه‌و پاره‌ بڕاوانه‌ بگێڕنه‌وه‌ ئه‌و ده‌م ئه‌گه‌ر نه‌یارێكی‌ ده‌وڵه‌تی‌ كوردیتان دیته‌وه‌ ناسنامه‌كه‌ی‌ لێبسه‌ننه‌وه، ئه‌و ناسنامه‌یه‌ی‌ هێشتا دروستتان نه‌كردوه.

پێویسته‌ خه‌ڵك بزانێ‌ ئه‌و هه‌مو پاره‌یه‌ له‌كوێیه‌، ئایه‌ ئه‌و سه‌د ملیار دۆلاره‌ی‌ ئه‌م یه‌ك دو رۆژه‌ باسكرا، هی‌ كێیه‌ چۆن براوه‌ بۆ براوه‌؟ 20 ملیار له‌و هه‌موه‌ بێننه‌وه‌و ژیانی‌ خه‌ڵكی‌ پێ‌ چاك بكه‌ن، موچه‌كانی‌ خه‌ڵكی‌ پێبده‌ن، ئاوڕێک بۆ مێژو بدەنەوەو چارەنوسی عه‌لی‌ عه‌بدوڵاو سه‌دام و موباره‌ك و قه‌زافیتان لەبیر بێت.