كوا un؟ کوا مافی مروڤ؟

وترا دوای جەنگی جیهانی دووەم و دامەزراندنی un و ئەنجومەنی ئاسایشەکەی ، ئیتر تەواو ئۆقرەیی وئاسایش باڵ ئەکێشێ بەسەر جیهاندا و تەواو جەنگی گەورە ڕوونادات ..

وترا ڕێککەوتننامەکانی ژنێڤ 1 و ژنێڤ 2 ئیتر بەهێزەکان بێ هێزەکان ناخۆن و چیتر مافی مرۆڤ پێشێل ناکرێ ..کە چی بەهاوکاری زلهێزەکانی خاوەن ڤیتۆ زاێونیەکان هەرلەوساڵانەدا، فەلەستینیەکانیان بەو دەردە برد ،لەسەرەتای پەنجاکاندا، شەڕی خوێناوی کۆریا هەڵگیرساو ئەمریکاو سۆڤیەت دوو سپۆنسەری سەرەکی و بگرە لایەنی سەرەکیش بوون تێیدا، بەدوای ئەویشدا هەرلە ناوەراستی پەنجاکان و سەرەتای شەستەکانیشدا، شەڕی پڕ ئێش و ئازارو وێرانکەری ڤێتنام بە دەستێوەردانی ڕاستەوخۆی ئەمریکاو لەولاشەوە سۆڤیەت بەرپابوو ، گەورەترین تاوان و ئابڕوبردن و پێشێلکردنی مافی مرۆڤیان تێداتۆمارکرا لەلایەن ئەمریکیەکانەوە. پاشان هەر لە سەرەتای هەشتاکانی سەدەی پێشوودا، شەڕی نەگریسی هەشت ساڵەی ئێران و ئێراق ،دیسان بە فیت و بەپاڵپشتی زلهێزە باڵا دەستەکانی نێو ئەنجومەنی ئاسایش ،بۆ هاوسەنگکردنی هاوکێشەکان بەرپاکرا..

هەرلەو سەروبەندەشدا و لەپێش چاوی un و زلهێزەکان، دوو تاوانی هەرەگەورەی (ئەنفال و کیمیاباران) لە دژی گەلی کوردی باشور ئەنجام دراو دەیان هەزار مرۆڤی سڤیل و بێ گوناه بوونە قوربانی ، هەزاران گوندو شار لەلایەن ڕژێمی دوابڕاوی بەعسه وە وێران کران ..

وائێستاش هەرچەندە لەسەرەتای سەدەیەکی دیکەداین، کەسەدەی بیست و یەکەم و سەردەمی عەولەمەو ئینتەرنێت و دیجیتاڵ و چی و چیە ، وا جارێکی تر لەپێش چاوی un و ئەمریکای براگماتی و هاوپەیمانە بەرژەوەندخوازەکانی ، ڕوسیا بەکوشندەترین چەک و بەهاوکاری ئێران وبۆ ڕزگارکرنی دکتاتۆرێکی خوێنڕێژی دیکەی ناوچەکە ، حەلەب و ئەدلب و ناوچە ئازادکراوەکانی سوریا ،بۆردومان و خاپوردەکاو سەدان ژن و منداڵ و پەککەوتە خەڵتانی خوێن دەکات ..

کوا ئەنجومەنی ئاسایش ؟کوا ڕێکخراوە ناوگەورەو ناوەڕۆک بچووکەکانی مافی مرۆڤ؟ کوا ئەمریکای (پارێزەی ستەم لێکراوان؟) بەڕاستی ئەگەر شەرم و حەیا و ئەگەر بەها مرۆییەکان ،بوونیان هەبایە ، بەوشێوەیە مافی مرۆڤ هەتک نەدەکرا ..

بەدڵنیاییەوە ئەوزلهێزانە ئەم ڕێکخراوانەیان پێکهێنا بۆ شەرعیەتدان بەدەستێوەردانی خۆیان لەکاروبای وڵاتان و زیاترکۆنترۆڵکردنی سەروەت و سامانی جیهان ، بۆیە نابێ چیتر مرۆڤایەتی بەدروشمی باق و بریقی (ئاسایشی جیهانی و مافی مرۆڤ )فریو بخۆن، بەڵکو جێی خۆیەتی بیر لەڕێگای تر بکەنەوە ، بۆئەوەی وڵاتەکانی ئەوانیش ببنە ژمارەو بخوێنرێنەوە..