لە ڕێكەوتنەكەی گۆڕان و یەكێتی چیمان چنیەوە ...!؟

:
... پانۆڕاما و ماجەرای ڕوداوەكانی پاش و پێش ڕێكەوتنەكەی‌ نێوان گۆڕان و یەكێتی لە ١٧ی ئایاری ماڵی تاڵەبانی هەتا كۆبوونەوەی 12 ی حوزەیرانی هەولێری نێوان یەكێتی و پارتی بەرەو ئەو قەناعەتەمان ئەبات كە ناوەڕۆكی ڕێكەوتنەكە تەنها لەچوار چێوەی نووسین و ‌وەكـ دەقێكی پیرۆزی مێژوویی دەمێنێتەوە ، ئەمەش وەكـ هەر ڕوداوێكی تری ئەم هەرێمە دەچێتەوە خانەی لەبیرچووان و كاری پێ ناكرێت‌ ! هەر بۆیە ئەوەی ئەنجامدرا جگە لەوەی پەلەكردن و هەڵپڕوزانی پێوەدیاربوو ‌ مەرام و ئامانجێكی سیاسی و واقیعێكی داسەپاوی تایبەت بەناوخۆی هەر یەكـ لەگۆڕان و یەكێتی كاریگەری هەبوو لە واژۆكردنی ڕێكەوتنەكە ! من لێرەوە هەوڵ ئەدەم وێنەكان وەكـ خۆی بگوازمەوە بۆ ئەوەی پێكەوە بگەینە دوا وێستگەو ئەو وێنەیەش كە دواجار سیمای ڕێكەوتنەكەمان پێ دەناسێنێتەوە :
:
1- ئەم ڕێكەوتنە لە كاتێكدا واژۆ دەكرێت یەكێتی ڕێكەوتنی نهێنی و ستراتیژی و لە گەڵ پارتیدا هەیە ، هەر بۆیە زۆر ئەستەمە ڕێكەوتنێكـ سەركەوتن بە دەست بێنێ بۆ هێزێكی وەكـ یەكێتی نەتوانێ دوولایەنەكەی تر قایل بكات كە ئەم ڕێكەوتنە دژ و پێچەوانەی ئەویتر نیە !
:
2- بەشێكـ لە خاڵ و بەندەكانی نێو ڕێكەوتنەكە هەتا ئێستاش جێگای مشتومڕی ناوخۆی یەكێتی و بەشێكـ لە هەڵسوڕاوانی ناو گۆڕانە ، تەنانەت ئەندامێكی مەكتەبی سیاسی لەساتەوەختی واژۆكردنی ڕێكەوتنەكە ڕایگەیاند ئەوان دژی ئەو خاڵانەن كە گۆڕان فەرزی كردوە ، ئەمەش لە جێبەجێكردندا گرفت دەخوڵقێنێت !
:
3- لە كاتی واژۆكردنی ڕێككەوتنەكە كە لە ماڵی جەلال تاڵەبانی بەڕێوەچوو ، هەریەك لە مەلا بەختیار بەرپرسی دەستەی كارگێڕیی مەكتەبی سیاسی و ئەرسەلان بایز و ئازاد جوندیانی و عەدنان موفتی ئەندامانی مەكتەبی سیاسی و حەمەی حەمە سەعید ئەندامی‌ سەركردایەتی ئامادەی ڕێوڕەسمەكە نەبوون ! ئەمەش دیارە بەشێكی بەرچاو لە بەرپرسانی باڵای ئەو حزبە جۆرێكـ لە جۆرەكان بەكۆی ناوەڕۆكی ڕێكەوتنەكە ڕازی نین !
:
4- دوا بەدوای ئەم ڕێكەوتنە بەهەمان شێوە چەند بەرپرسێكی گۆڕان ناڕەزاییان دەربڕی و لەبەرامبەردا نامەی دەستلەكاركێشانەوەیان بە حزبەكەیان پێشكەشكرد ، وەكـ كاردانەوەیەكی تووند و چاوەڕواننەكراو پەیوەندیان بەپارتیەوە كرد ! چونكە ئەوان پێیان وابوو بزوتنەوەی گۆڕان فریووی داون و ئەم ڕێكەوتنەش هیچ لە پرسەكان ناگۆڕێت !
:
5- هەرچی پەیوەندی بە پارتیەوە هەبوو پاش ڕۆژێكـ لە ڕێكەوتنەكە لەبەیاننامەیەكدا بە تووندی نیگەرانی و دوودڵی خۆیان ڕاگەیاند ، ئەم هەنگاوەی یەكێتی و گۆڕان بە گەڕانەوە بۆ دواوەو ڕۆژانی سەختی دوو ئیدارەیی و شەڕی خۆكوژی هێنایەپێش چاو ، هەروەها دووپاتیان كردەوە كە ئەوان لە گەڵ وەفدێكـ كۆنابنەوە لە گۆڕان و یەكێتی پێكـ هاتبێ ، بەلای بەندەوە ئەمە یەكەمین گورزی كەمەر‌شكێن بوو پارتی لە ڕێكەوتنەكەی دا ! لێرەوە ناكۆكی و ڕای جێاییەكانی ناوخۆی یەكێتی زیاتری كرد و دەنگە ناڕەزاییەكان لە پەنهانەوە كەوتەوە سەرشاشە و لە كەناڵەكانەوە پەخشكرا !
:
6- بە بڕوای بەندە دووەم گورز و خاڵی وەرچەرخانی ڕیكەوتنەكە بەرەو دواوە پێكهێنانی دوو وەفدی جێاواز بوو لە لایان یەكێتی بۆ دانوستان لە گەڵ پارتی و گۆڕان ، ئەمەش‌ هەنگاوی یەكەمی شكاندنی ڕێكەوتنەكە بوو بە عەمەلی ، چونكە بە پێی ڕێكەوتنەكە دەبوو گۆڕان و یەكێتی بۆ قسەكردن لە گەڵ پارتی و لایەنەكانی تر پێكەوە وەكـ تیمێكی تۆكمەو یەكگرتوویی سەردانەكان ئەنجام بدەن ! لەبەرامبەردا بێ دەنگی گۆڕان و ڕازیبوون بەم پێشهات و پێشێلكردنەی یەكێتی بۆ بەندەكانی ڕێكەوتنەكە‌ بەڵگەیە لەسەر ناكارایی ناوەڕۆكی ڕێكەوتنەكە و تێپەڕاندنی دۆخەكە !
:
7- لە یەكەم كۆبوونەوەی نێوان پارتی و یەكێتی و ڕەدكردنەوەی پارتی بۆ كاراكردنەوەی پەرلەمان و هاتنەوەی دكتۆر یوسف محمد و قسەكردن لەسەر پۆستەكەی بارزانی ، دژایەتیكردنی ئەوان بۆ ئەو خاڵەی ڕێكەتنەكەی نێوان گۆڕان و یەكێتی كە باس لە كاراكردنەوەی پەرلەمان و چارەنووسی بارزانی دەكات ، ناچارین جارێكی تر بێ ئومێدی خۆمان لە لێكەوتەكانی ڕێكەوتنەكە نەشارینەوە !
:
...... ماوەتەوە بڵێم ئەگەر كاتی خۆی گۆڕان لەبەرامبەر هەژموونی باڵێكی دەست ڕۆیشتووی ناو یەكێتی و تۆمەتباركردنی ئەو باڵە بە گەندەڵ و درۆو دۆلار جێابوویەوە و بزوتنەوەی گۆڕانی ڕاگەیاند ! پاش حەوت ساڵ و گەڕانەوەی گۆڕان بۆ ناو یەكێتی و واژۆكردنی ڕێكەوتنەكێكـ لە گەڵ هەمان باڵ و دەستە ! ئیدی چ مانایەكـ بۆ بوون و مانەوەو ڕێكەوتن و واژۆكان ئەمێنێتەوە ..!!