ئایندەی كوردستان لە نێوان داعش و حەشدی شەعبی دا ..!؟

 

 ترۆر و تیرۆریستان لە هەر شوێن و جێگە و زەمان و زەمینێكـدا بن ، لە نێو هەر نەتەوەو جوگرافیا و ئاست و بیركردنەووەیە‌كی ئایدۆلۆژی و كۆمەڵایەتیدا بن ، هیچ لە دڕندەیی و ترسناكی و پێویست بوونی دژایەتی و ڕەدكردنەوەی دەستەجەمعی ناگۆڕێت ، واتە هیچ پاساوێكـ بایی ئەوەندە نابێ‌ ستایش و پێاهەڵدانی بكەرو ئەنجامدەرانی بكرێت ، بەڵام بەگوێرەی هەلومەرج و بارودۆخی وەڵات و ژینگەیەگـ بۆ ئەویتر قەبارەی مەترسی و ئامانجی تیرۆریستان جێاواز ئەبێ ، لێرەوە سەربارەی ئەوەی بۆ ماوەی دووساڵە لە لایان ڕێكخراوی تیرۆریستی نێودەوڵەتی داعش شەڕێكی نەگریسی سەپێنراو بەرۆكی كوردستان و هێزەكانی پێشمەرگە و گەل و ووڵاتی بەگشتی گرتووە ، لەو پێناوەشدا ژمارەیەكی زۆر لە ڕۆڵەی بەئەمەكـ و پێشمەرگەی بێ نان و ئاو شەهید و بریندار بوون بەردەوام ئەم ژمارەیە لە هەڵكشاندایە ، هێشتا هەڕەشەكانی ئەم ڕێكخراوە و مەترسیەكانی بۆ سەر هەرێمی كوردستان و ناوچەكە بەردەوامە و ئاسۆی دەربازبوون لەم دێوەزمەیە ڕوون نیە ! كەچی بەداخەوە ماوەیەكە هەواڵی شەڕو پەلاماری حەشدی شەعبی ( شیعە ) بۆ سەر ناوچەكانی كوردنیشین و شارەكانی هێڵی هاوتەریب بە دەرەوەی هەرێمی كوردستان بڵاودەبێتەوە و بۆ چەندین جار لە نێوان هێزەكانی پێشمەرگەی كوردستان و گروپە توندڕەوەكانی شیعە گرژی و ئاڵۆزی و شەڕو كوشتار ڕوویداوە ، بە گوێرەی‌ لێدوان و جموجوڵی سەربازی و سەربازگەكانی ئەم میلیشایە و بە خوێندنەوەی پاشخان و ئەو جۆرە لە تێڕوانین و دیدگای ئەواندا بەدی دەكرێت ، مەترسی و ترسناكی ئەم هێزانە ئەگەر لە هەڕەشەو مەترسی داعش زیاتر نەبێ كەمتر نیە و لە ئێستادا بوونەتە سەرچاوەی ترس و دڵەڕاوكێ حەقیقی ، ! بەداخەوە ئەوان لە بری پێشكەشكردنی هاوكاری ماددی و مەعنەوی بۆ هێزی پێشمەرگە ، هەتا پێكەوە جەنگی تیرۆر و ڕێكخراوی تیرۆریستی داعش بكەن ! ناوە ناوە بیانوو بە هێزەكانی پێشمەرگەو دەسەڵاتدارانی ئیداری و دانیشتوانی شار و كوردستانی بوونی شارێكی وەكـ شاری خورماتوو دەگێڕن ! واتە كوردستان لە یەك كاتدا ڕووبەڕووی زیاد لە شەڕو گرفتێكی سیاسی و سەربازی بووەتەوە !؟ لێرەدا ئەمەوێ بەراوردێكی خێرا لە نێوان میلیشیای حەشدی شیعەو ڕێكخراوی داعش لە چەند خاڵێكدا بخەمە ڕوو :
:
1- داعش كوڕی شەرعی قاعیدەیەو ڕێكخراوێكی تیرۆریستی جیهانی جیهادیەو ئەركەكانی ڕێكخراوی قاعیدە لە ڕۆژهەڵاتی ناوەڕاستدا بەوەكالەتی جیهادیەكانی جیهان تەواو دەكات ! ،،، بەڵام حەشدی شەعبی كوڕی شەرعی ئێرانە و ڕێكخراویكی میلیشایی چەكداریە شیعەیە ، بەوەكالەتی ئێران و شیعەی جیهان لە شەڕو جەنگ دان !
:
2- داعش بە پاڵپشتی دەزگای هەواڵگری نێودەوڵەتی و بەهاوكاری ووڵاتانی ناوچەكەو بە موبارەكی دیكتاتۆرەكانی جیهانی ئیسلامیی داهێنراوە ! ،،، بەڵام حەشدی شەعبی لە لایان دەزگا هەواڵگیریەكانی ئێران و بە هاوكاری شیعەكانی عێراق و سوریا و لوبنان و یەمەن داهێنراوه ‌ !
:
3- داعش بە حیساب تۆڵەی ستەملێكراوانی شوێنكەوتووانی سوننە مەزهەب ئەكەن ، گوایە لە گەڵ زلهێزانی جیهانی لە جەنگدایە بۆ ڕاماڵینی سوپای داگیركاری صەلیبی و جولەكە و كوفری عالەمی ! ،،، بەڵام حەشدی شەعبی لەژێر پەردەی تۆڵەسەندنەوە لە شوێنكەوتوانی شیعە مەزهەب و خوێنی بە ناحەق ڕژاوی ئالو بەیت لە دژی شوێنكەوتوانی سوننە مەزهەب شەڕی سیاسی و ئابوری خۆیان دەكەن !
:
4- داعش ڕێكخراوێكی كۆچەری و ڕەوتەنیەو بۆ مەرامێكی كاتی و تەكتیكی لە شوێنێكەوە بۆ شوێنێكی تر دەگوازرێتەوە ، ئامانجی مانەوەیان كاتیەو زۆر جار بە گوێرەی پێویست و پیلانەكانی نێودەولەتی جێگۆڕكیان پێدەكرێت ! ،،، بەڵام حەشدی شەعبی ئامانجیان داگیركردن و پیلانی پەلهاویشتن و فرانخوازیان هەڵگرتووه هەر شوێن و ووڵاتێكیان داگیر كرد بە ئاسانی دەستبەرداری نابن !
:
5- داعش جگە لە خۆیان هیچ گروپ و ڕەوتێكی سوننی یاخود شیعەیان پێ قبوڵ نیە ، هەر لایەنێكـ لە فەرمانی ئەوان لابدا خوێنی حەڵاڵ دەكەن ! ،،، بەڵام حەشدی شەعبی تەنها دژی سووننەكان دەجەنگن بە هیچ جۆرێكـ دەستی شەڕو كاولكاریان ناگاتە شوێنی نیشتەجێی شوێنكەوتوانی شیعه مەزهەب و كوشتاری ئەوان حەرامكراوە !
:
6- داعش لە كاتی داگیركردن و كۆنترۆڵكردنی شارو گوندەكاندا جگە لە كوشتن و فڕاندن ، كەرەستەكانی ناو ماڵ و كەلوپەلی بازاڕەكان بە لایانەوە گرنگ نیە و لە كاتی هەڵهاتندا بەجێی دێڵن ! ،،، بەڵام حەشدی شەعبی بە هۆی فەتوای گەورە مەرجەعەكانیان هەموو شتێكی غەیرە شیعە حەڵاڵە و پاش كوشتن و بڕین و گواستنەوەی تەواوی ماڵ و بازاڕەكان ، ئەوجا گەڕەك و كۆڵانەكانیش دەتەقێننەوەو كاولی دەكەن !
:
7- داعش ڕێكخراوێكی تیرۆریستی قەدەغەیەو مامەڵەی فەرمی لەگەڵدا ناكرێت ، واتە گەمارۆدان و قەتیس كردنی سەرچاوەكانی هێز و توانای سەربازی و دارایی ئاسانە ئەگەر بیانەوێ !؟ ،،، بەڵام حەشدی شەعبی میلیشیایەكی فەرمی دانپیانراوی دەوڵەتەو بووجەو مووچەی تایبەت بە خۆیان هەیە بە ئاشكرا پاڵپشتی ئەكرێت !
:
8- ڕەنگە لە داهاتوودا شەڕی داعش كۆتایی پێ بهێنرێت و لە ناوببرێت ! یاخود لە كوردستان و ناوچەكە دووربخرێتەوە ! ،،، بەڵام شەڕ و گێچەڵیەكانی حەشدی شەعبی كۆتایی بۆ نیە و لە بن نایەت ! بەڵكو ڕۆژ لە دوای ڕۆژ زیاتر پەرەدەسێنێ و حكومەتی عێراق و ئەو عەقڵێەتەی كە لە پشت داهێنانی ئەم هێزانەوەیە كۆمەكـ و هوكاری دەكەن و ناهێڵن لاواز و بێ ڕۆڵ بمێنێتەوە ! ... لێرەوە هەڕەشەو ترسناكی جیددی بۆ سەر ئایندەی ئەم هەرێمە ببینەوە ..!؟